Shillong, Nailur 29
Ka ïingbishar jong ka R Rymbai, Special Judge (POCSO), East Khasi Hills ka la rai pynrem ïa uwei u briew bad hukum ban set 10 snem ha phatok, uba la donkti ban leh be-ijot ïa kawei ka khynnah rit ha Nongthymmai.
Ka ïingbishar jong ka R Rymbai, Spl. Judge (POCSO), East Khasi Hills, ha ka 25 tarik Nailur, ka la lap ba u Batskhembor Diengdoh u la donkti ha ka Special (POCSO) Case No. 55 jong u snem 2017 kaba mih na ka Rynjah PS Case No. 28(10)2016.
Ha ka kyrwoh ba la pyllait ha ka sngi Ba-ar, u SP ka East Khasi Hills Bah Vivek Syiem u la ong, ïa kane ka mukotduma la register ha ka 17 tarik u Risaw, 2016, hadien ba la ïoh pdiang ïa ka FIR ha Nongthymmai BH ba u Bah Diengdoh u la leh be-ijot ïa ka khun kynthei jong u nongujor, kaba don jingduna ha ka jingmut jingpyrkhat.
Ki pulit ki la kem ïa une u briew bad hadien ki la file ruh ïa ka charge-sheet vide CS No. 31/2017 tarik 31.05.2017 hapoh ka kyndon 5(k)(j)/6 jong ka aiñ POCSO.
Haba pynshitom ïa u runar, ka ïingbishar ka la hukum ban set phatok ïa u haduh 10 snem bad ka kuna kaba T.30,000 hapoh ka kyndon 6 jong ka aiñ POCSO, bad ruh ban set phatok sa 3 bnai kynthih lada um lah ban siew ïa ka kuna.
Utei u nongshah rai pynrem u la dep ban pynlut lypa 3 bnai bad 2 sngi ha phatok kum u briew uba don hapdeng jong ka jingshah tian bishar kum ka jingbishar hapoh, bad kumta mynta un hap ban shong phatok bad pyndep ïa ki sngi kiba dang sah.
Ïa kane ka jingtohkit la ïalam da ka WP/Insp BM Kharakor, ba don mynta ha CID Organisation, Meghalaya, Shillong.
