Shillong, Nailur 29
Da ki spah ngut ki nongkyrshan na kiwei ki sengsaiñ pyrthei na Rilum Jaiñtia kynthup u MLA barim u Bah Draison Kharshiing bad MDC barim u Bah Lakhon Biam ha ka sngi Ba-ar, ki la ïasoh noh bad ka Bharatiya Janata Party (BJP).
Ïa ki palat 200 ngut kiba wan ïasoh thymmai sha ka BJP la pdiang sngewbha da u Myntri Sorkar, u Bah Sanbor Shullai bad u President ka BJP Meghalaya, u Rikman Momin ha ka jingdonlang kiwei ki nongïalam ka Party.
Haba kren ha kane ka sngi u Bah Sanbor u la ïathuh ba kiba dang shu wan ïasoh thymmai bad ka BJP, kidei ki nongkyrshan na kiwei ki sengsaiñ pyrthei kynthup ka NPP, VPP bad Congress.
U Bah Sanbor u la ïaroh ïa kiba dang shu wan ïasoh thymmai bad ka BJP, da kaba ong ba ki la sngewthuh ba dei tang ka BJP kaba lah ban kyntiew ïa ka roi ka par bad ïa ka bha ka miat jong ki paidbah bad ka Jylla.
U la kyntu ïa ki nongkyrshan ba kin ym shah ïalam bakla ha kiwei ki sengsaiñ pyrthei kiba ju kynnoh ba ka BJP ka lehbeiñ ïa ki riewngeit Khristan.
“Lada don kiba kynnoh ba ka BJP ka pyrshah Khristan, kylli kylla ïa ki, haei bad mynno u Bah Sanbor u la phah khang Ïingmane naduh ba u jop MLA na ka BJP” la ong u Bah Sanbor.
