Shillong, Nailur 29
U Bah VGK Kynta u la rai ba un ïakhun beit ïa ka ilekshon MP Lok Sabha shiteng samoi na Shillong Constituency kum u kyrtong ka UDP wat hadien ba ki phra ngut ki MLA ka UDP ki la mih bad leit pynïasoh sha ka Bharatiya Janata Party (BJP).
Haba ïakren bad u Bah VGK Kynta u la ïathuh ba ka jingpynïeng ïa u kum u kyrtong ha kane ka ilekshon MP shiteng samoi kam dei ba pynïeng kine ki phra ngut hynrei dei ka UDP kaba pynïeng ïa u.
U la ïathuh ïa kine ki phra ngut ki MLA kiba la mih dei ki paidbah kiba la jied ïa ki, kumta u don jingkyrmen ba ki paidbah kin sa rai haba un ïakhun beit ïa ka ilekshon shiteng samoi ha kane ka ilekshon MP Lok Sabha.
U la pynkynmaw haba ka UDP ka la rai ban pynïeng ïa u kum u kyrtong, baroh ki MLA ki la ïadon lut, lait tang u Bah Paul Lyngdoh hynrei um shim ba kine ki phra ngut ki shet kylla namar kane ka jingmih jong ki na ka UDP ka dei da ka mon jong ki.
Shuh shuh u Bah Kynta u la ong, ha ka por ba ka UDP ka pynïeng ïa u Bah Robertjune Kharjahrin ha ka ilekshon MP Lok Sabha ha u snem 2024, ki MLA ki don haduh 14 ngut, kynthup ïa ki 2 ngut ki MLA ka HSPDP hynrei ka jingïoh vote ka long tang 44 hajar vote hynrei u kyrtong ka VPP kaba don tang 4 ngut ki MLA u ïoh ïa ka jingjop namar ka rai kan dei jong ki paidbah ym ïa ka jingdon ki MLA.
U la buh jingkylli ruh ïa kito ki phra ngut ki MLA kiba la dep pynpaw ba kin rung BJP lada ki mat jong ki kin urlong hynrei haduh mynta um pat ïohi ban seisoh namar ka dei tang ka jingpynthame ïa ki paidbah.
Ha kajuh ka por u la ong ba lada u jop un dawa ba dei ban pynbeit biang ïa ka ‘Tenth Schedule’ kaba dei ka aiñ kyntiap seng namar lada kino-kino ki MLA ne MP haba ki mut ban leit pynïasoh bad kawei ka seng ki dei ban hiar shwa na ka jinglong MP ne MLA hadien kata kin sa rung sha kawei ka seng.
Halor ki lai ngut ki MLA ka UDP kiba la pynkhreh ban phet noh, u Bah Kynta um kwah ban ong eiei namar um pat ïohi ba kin mih hynrei u kren beit ïa ki MLA kiba la dep mih.
