Shillong, Nailur 29
U Bah Sanbor Shullai uba dei u Myntri na ka BJP ha ka Sorkar MDA-2 u la ïathuh ba ka jingong ba ka BJP kan dawa ïa ka shuki Symbud Myntri Rang-bah bad sa ar tylli ki shuki Myntri ha kane ka Sorkar MDA-2, kan shong beit ha ka jingïakren bad pynbeit ki nongïalam na Delhi.
Kane ka jingpynpaw jong u Bah Sanbor ka la long hadien ba la kylli hato ka don ne em ka jingpynbeit ban pynrung shuh ïa ki MLA ka BJP ha ka kynhun Myntri ne ban dawa shuki Symbud Myntri Rangbah hadien ba ka jingdon ki MLA ka BJP ka la kiew na ka 2 sha ka 10 ngut.
Haba ïakren bad u Nongsaiñ Hima hadien ba la wai ka jingïalang pynrung dkhot ïa ki paidbah ha ka BJP ha Shillong kiba wan na Rilum Jaiñtia, u la ïathuh ba kaei-kaei kaba kine ki phra ngut ki MLA ka UDP kiba dang shu rung sha BJP ka dei beit ka jingïapynbeit bad ki nongïalam ka BJP ha Delhi.
U la ong kumba ki rung BJP sha Delhi, ka jingïakren ban pynrung Myntri ha Sorkar MDA-2 ruh ka dei beit bad ki nongïalam na Delhi.
Katkum ki khubor kiba la ïoh lum la ïathuh ba ka la don ka jingtynruh ban pynrung ïa u Bah Lahkmen Rymbui uba la dei lypa u Myntri ha ka Sorkar MDA-2 naduh ka bhah jong ka UDP sha ka shuki Symbud Myntri Rangbah ka Jylla.
Nalor kane, ka khubor ka ïathuh ruh ba la tyrwa ruh ba dei ban pynrung Myntri ïa u Bah Mayralborn Syiem bad Bah Kyrmen Shylla ha ka Sorkar MDA-2 ba la ïalam da u Conrad K Sangma.
Haduh mynta, kane ka jingïapynbeit ka dang ïaid hapdeng ki nongïalam ka BJP na Delhi bad u Conrad K Sangma uba dei u Myntri Rangbah ka Jylla.
Ki khubor kiba la ïoh lum ba lada katei ka jingdawa la mynjur hapdeng u Amit Shah uba dei u Myntri ka Sorkar Pdeng bad u Conrad K Sangma, la sngewthuh ba uwei u Symbud Myntri Rangbah la shah pynhap beit, nangta sa ar ngut ki Myntri kiba la don lypa ruh kin sa hap shah pynhiar khet.
