Nongstoiñ, Nailur 29
U MDC ka VPP na Nongstoiñ u Dr. Juristman Ïawphniaw u la ong, “Nga pan map ba ki don ki khynnah kiba la wan na ki jaka ba jngai ba jngai ban leh ïa ka interview hynrei na ka bynta ka jingbha jong ki para samla ngi hap ban shim ïa kane ka sienjam kaba eh kaba ngi hap ban pynsangeh ïa kane ka interview.”
U Dr. Juristman u la pynpaw haba kren hadien ba u la leit ban rung hapoh Conference Hall jong ka DC ophis ha Nongstoiñ ban pynsangeh ïa ka ‘interview’ na ka bynta ka kam ‘staff nurse’ ba kila dep pass ïa ka jingthoh eksamin, kaba la long ha ka step jong ka sngi Ba-ar ka taïew.
U Dr. Juristman u la ong, “Ngi dap da ka jingsngewsih haba ngi la ïohi kumto ha ki lad pathai khubor ba ki don ki kynrum kynram ha ka jingthung kam thung jam ha ka kam Nursing kiba dei ban ïoh ïa ka post ha MCH Nongstoiñ hynrei ngi sngewsih haba ngi wan ha ophis ngi lap ba ka don ka interview kaba dang ïaid shakhmat wat hapdeng kito ki jingkynnoh kiba long khia bha”.
Shuh shuh u la ong, ha ka jingshisha ka DC kala dei ban shim ka jingkitkhlieh kumba la dep ban ïakren mynnin bad ka Director ba la kumno-kumno dei ban pynsangeh shuwa ïa ka interview bad yn peit hadien ïa kaei kaba yn leh hynrei ïa mynta dei ban pynsangeh shuwa ban sei shuwa ïa kita ki jingshisha baroh.
Na ka liang u MDC u la ong ruh ba “Yn sa peit kumno ka DC kan leh ïa kane ka sienjam kaba ngi, ngi kwah ba kan long ha kaba bha bad ka jingsuk bad ngim wan hangne ban ai ding hynrei ban peit ïa kiei-kiei kiba long kiba ïaid bha kiba man bha.”
