Jowai, Nailur 29
Ki trai jaka bad ki nongrep na Shnongrim, Elaka Nongkhlieh, East Jaiñtia Hills, ki la aiti ïa ki jingthoh ban pynshisha ïa ka jingkam ka jong ki sha ka Fact-Finding Committee jong ka Sorkar Meghalaya ha ka 28 tarik Nailur 2026 halor ka par mawshun jong ka Shree Cement Pvt ha Lum Syrman.
Ki trai jaka ha ka jingthoh kaba la ai sha ka Fact Finding kila kynnoh ba ki pulit bad ki briew kiba kah durkhmat ki la khang ïa ka surok bad kawang maw ban khanglad ïa ki nongshong shnong ban leit sha ka Public Hearing kaba la buh ha ka 31 tarik Naitung 2026.
Katkum ka kaiphod jong ka Dorbar Shnong Shnongrim, ha ka por kumba 7 baje mynstep ha ka 31 tarik Naitung, ki pulit ki la khang ïa ka surok NEC ha Lad Shnongrim, kaba la khanglad ïa ki nongshong shnong ban leit sha ka Public Hearing.
Baroh kiba thmu ban leit sha ka ‘hearing’ kiba wan na Khliehriat, Jowai bad kiwei ki shnong kila shah khang ha kane ka jaka.
Ka Dorbar Shnong ka la pynpaw ruh ba ki jingkieng ïaid kjat kiba shna da ki siej halor ka Wah Litein (Shynriang) bad Wah Krong ki la shah pom, shah pyndkut bad shah pynjot, kaba la pynlong ïa ki nongshong shnong ban ym lah shuh ban ïaid sha kawei pat ka liang.
La kam ruh ba ki don 117 tylli ki longïing kiba don ka hok bad nongkynti ïa ki 158 tylli ki jaka rep ha Lum Syrman. Kine ki jaka ki dei ki jaka rep bad ki la pyndonkam da ki nongshong shnong da bun snem. Ki trai jaka ki la aiti ruh ïa ki kot ki sla bad ki sakhi kiba kynthup ïa ki Patta/LHC, land records, ki jingpynshisha na JHADC, ki jingpynshisha na u Doloi, maps, ki rekod ba ïadei bad u pud u sam.
Ki la kyrpad ïa ka Fact-Finding Committee ban bishar ïa ki kot ki sla, ki sakhi bad ki jingpynpaw ba la aiti, bad ban sngap ïa ki liang bapher-bapher shuwa ban pynkhreh ïa ka Fact-Finding Report.
Ka Fact-Finding Committee ka dang tohkit ïa ki daw bad ki jingjia kiba la ïalam sha ka jingkhanglad ïa ki nongshong shnong ban ïashim bynta ha ka Public Hearing jong ka 31 tarik Naitung, bad ban bishar ruh ïa ki jingktah kiba ïadei bad ka mariang, imlang sahlang, aiñ bad ki kam runar kiba ïadei bad ka project Shree Cement.
