Shillong, Nailur 29
Ka Hynñiewtrep Integrated Territorial Organisation (HITO) ha ka 29 tarik Nailur, 2026, ka la leit ban kynduh ïa ka Kong D. Syiemlieh, Senior Environmental Engineer, ban ïakren halor ka bai daiñ kuna ïa ki karkhana kiba la pynkheiñ ïa ki kyndon aiñ.
Haba kren sha ki lad pathai khubor, u Bah Donbok Dkhar, President, u la ong ba dang ha ki khyndiat bnai ka HITO ka la lap ïa artylli ki karkhana, kata ka RNB Cement bad ka Riangdo Veneer Pvt Ltd, kiba la pynmih ïa ka lyer jakhlia bad kiba la pynkheiñ ïa ki kyndon aiñ.
U la ong ba ka long pat kaba sngew samrkhie, ba ka jingdaiñ kuna ïa kine ki karkhana, ka long tang da ki hajar tyngka.
Nalorkata, u la ong ruh ba na ka liang ka Board, kadei ban shimkhia halor kane bad ban ai jingmut ba dei ban pynkiew ïa ka bai daiñ kuna.
“Lada ki paidbah kim lah ban peitngor naduh mynta ïa ka mei mariang, kan sa bamduh ïa ngi. Ka wah Umkhrah ruh kadei kaba la jaboh bha bad ka Sorkar ka la mang ban pynkhuid pat da ki klur tyngka, hynrei ban daiñ kuna pat tang da ki hajar ïa ki karkhana ba pynkheiñ aiñ, kam sngewïahap,” la ong u Bah Donbok.
U la kyntu ruh ba ki dei ban teh kyndon ïa kita ki aiñ, kiba la don, khnang ba ka mei mariang, kan long kaba itynnad bad kan neh. Da kaba bynrap ba kine kiba pynkheiñ ïa ka aiñ ruh ban pynjaboh ïa ka mei mariang, kidei ban shah pynshitom.
