Nongstoiñ, Nailur 29
Ka interview kaba dang ïaid na ka bynta ka kam ‘staff nurse’ ha MCH Nongstoiñ, ka la shah pynthut bad hap ban sangeh noh hadien ba u MDC ka Voice of the People Party (VPP) Dr. Juristman Iawphniaw u la rung hapoh ka hall ba pynlong interview bad ban buh jingkylli kylla ïa ki nongshim interview.
Ïa kane ka interview la buh bad pynlong ha ka 29 bad 30 tarik mynta u bnai ha conference room jong ka Deputy Commissioner ka West Khasi Hills, hadien ba la dep jied ïa ki samla kiba la pass ïa ka ‘written examination’.
Katkum ka jingïathuh jong kiba la sakhi, u MDC u la rung khlem da pyntip katba ka interview ka dang ïaid bad u la ïeng pyrshah ïa ka interview board, kaba la pynlong ïa ki dkhot jong ka panel bad ki kyrtong ban lyngngoh bad pynthut ïa ka jingïaid lynti.
Shuh shuh kila ïathuh ruh ba ka jingshim interview kala ïaid bad la dep ruh haduh 4 ngut hynrei kala jia noh katei ka jingwan pynsangeh hynrei kila ïa ap beit triang haduh ban da ïoh ïa ki jingpynshai na ki bor pynïaid District ka WKHD.
Haba ïakren ïa kane ka bynta bad ki bor pynïaid District, la ong ba ha katei ka sngi kila don haduh kumba 60 ngut ki samla wad kam kiba la ap ban ïoh interview ïa ka kam ‘staff nurse’ bad la ong ruh ba katei ka kam ka dei tang ka ‘contractual’ kaba 6 bnai bad baroh kiba la pass ïa ka eksamin ki dei kiba la bit bad biang pura ban shah interview lane wat ban trei ïa kum kitei ki kam.
La ïathuh ruh ba katba ka interview ka dang ïaid la wan rung u MDC ka Nongstoiñ shapoh jaka shim interview hynrei la ong ba na ka liang ka DC kaba don lang hapoh kamra shim interview kam sngewïahap ïa katei ka rukom bad phah mih noh ïa ki shabar bad khot ruh ïa ki shapoh ka kamra treikam ka jong ka ban ïakren.
Ka khubor na ki heh ka District, la pynpaw ba ha ka jingshisha katei ka interview kam shym la don kano kano kaba pynsuba sniew eiei bad kam shym la don ruh kano-kano ka jingujor na ki kyrtong ba wan interview ïa katei ka kam pyrshah ïa ka tnad ba dei peit ne ïa ki bor pynïaid District.
La ong ba kum ïa kitei ki jait kam lah ban leh tang da ka interview ruh hynrei ki bor District kila phah thoh lang bad eksamin bad leh ruh ïa ka interview hynrei namar ka jingshah pynthut noh ïa ka jingshim interview, la pynsangeh shwa tang shipor bad la ong ruh ba ka jingkhot interview kan hap ïaid beit bad yn sa pyntip kham hadien.
