Shillong, Nailur 29
Ka ïingbishar Special Judge (POCSO) kala hukum ban set phatok 20 snem ïa u rangbah halor ka jingthombor ïa ka longrynïeng jong uwei u khynnah 7 snem ha Lumdiengjri ha u snem 2020.
Ka ïingbishar jong ka R Rymbai, Special Judge (POCSO), East Khasi Hills, ha ka 16 tarik Nailur kala pynrem ïa u Bah Pyntngenlang Nongsiej ha kaba ïadei bad ka Lumdiengjri PS Case No. 35(3)2020.
Katkum ka kyrwoh khubor kaba la pynmih da u Superintendent of Police, East Khasi Hills, u Bah Vivek Syiem, kane ka jingjia kala paw pyrthei ha ka 16 tarik u Lber 2020, haba ki bahaïing jong utei u khynnah kila leit ujor ejahar pyrshah ïa u Bah Nongsiej bad kynnoh ba ula leh be-ijot ïa u khun shynrang jong ki uba dang 7 snem ka rta.
Ki pulit kila register case hapoh ka Section 4/8 POCSO Act, la kem ïa utei u nongleh ïa katei ka kam runar bad hadien la Charge-sheet ïa u hapoh jong ka Section 7/8 POCSO Act vide CS No. 06/2022 jong ka 28.01.2022.
Hadien ka jingtian bishar, ka ïingbishar kala lap ba u la leh bakla hapoh jong ka Section 6 jong ka POCSO Act bad la hukum ban set ïa u 20 snem ha phatok bad ka jingdaiñ kuna kaba T.10,000. Lada um lah ban siew ïa katei ka kuna, un hap ban shong phatok sa 6 bnai.
Ki pulit kila pyntip ba une u briew u dei uba la shah set lypa ha phatok mynta la 9 bnai bad 4 sngi kum u briew uba don hapdeng jong ka jingshah tian bishar.
Ïa kane ka jingtohkit la leh da u Retd. UBSI SA Sangma.
