Shillong, Nailur 29
U Symbud Myntri Rangbah ka Jylla ka tnad kam pohïing, u Bah Prestone Tynsong ha ka Sngi Ba-ar u la ong ba ka jingtyrwa ban pynkylla ïa ka ‘Foreign Contri-bution (Regulation) Act’ (FCRA) kam dei kaba la thmu tang ïa ki kynhun Khristan hynrei ïa baroh ki kynhun kiba ïoh ïa ka jingbei pisa na shabar, bad ïa kane ka ‘Draft’ kaba mynta, donkam ban khmih bniah biang.
Haba jubab ïa ki jingkylli halor ka FCRA, u Bah Prestone u la ong, “Ngam tip shaphang kata ka jingmut, ngam don eiei ban ong. Hynrei lada phi kren shaphang ka ‘FCRA Amendment Bill’, kam mut kyrpang tang ïa ka kynhun Khristan. Ha ka jingshisha, kane ka dei na ka bynta kano-kano ka kynhun kaba ïoh ïa ka jingbei pisa ne jingnoh synñiang na shabar, kumta ka hap hapoh ka jingpeit jong kane ka jingpynkylla.”
U la ong ba ka jingbym bud ryntih ïa ki kyndon ba la tyrwa ka lah ban ïalam sha ka jingpyndam noh ïa ka jingpynrung kyrteng.
“Haba ngi kren shaphang kita ki jingpynkylla, lada jia ba kim lah ban pynthymmai, lada kim lah ban kohnguh ïa kiba bun ki kyndon ba la tyrwa, ha kaba kut ki lah ban shah pynshitom – ha ka jingmut ban pyndam noh ïa ka jingpynrung kyrteng,” u la ong.
“Dei na kata ka daw ba kan sa don ka jingsngewkhia jong baroh ki seng trei mon sngewbha ne NGO kiba la pynrung kyrteng hapoh kane ka aiñ, kynthup ïa ki kynhun Khristan, kaba long ba ka jingwanrah jingkylla kaba mynta ka donkam ban khmih bniah biang,” u la bynrap.
Na ka liang u Bah Prestone u la pdiang sngewbha ruh ïa ka rai ban rah ïa kane ka ‘Bill’ sha ka Joint Parliamentary Committee bad ka jingkynthup lang ïa u MP Rajya Sabha ba marwei jong ka Meghalaya na ka Thaiñ Shatei Lam Mihngi.
“Ainguh ïa U Blei, la kumno-kumno ka Parliament ka la rai ban phah sha ka Joint Parliamentary Committee. Kumba phi tip baroh, hadien kata, u Lamphang, da ka jingkyrpad jong u Myntri Rangbah ka Jylla jong ngi, u Conrad K. Sangma, u la pyrkhat bad mynta u James Sangma, u MP ba marwei na ka Thaiñ Shatei Lam Mihngi, u la shah kheiñ ruh kum u nongshah khot kyrpang sha kane ka komiti – kaba long ka dak jingkyrmen khamtam ïa ki kynhun Khristan bad ki Jylla jong ka Thaiñ Shatei Lam Mihngi,” u la ong.
