Nongstoiñ, Nailur 29
Ka District Medical Health Officer kala pyntip ba na ka liang ka komiti thung kam staff nurse contractual na ka bynta ka MCH Hospital Nongstoiñ, ba ka recruitment process nurse contractual kan ïaid beit shakhmat.
Ha ka kyrwoh khubor bala phah, ka Dr. Meribha Sohliya, DMHO West Khasi Hills District kala ong ba interview jong ka recruitment jong ki staff nurse contractual kaba long ha ka 29 tarik mynta u bnai la pynsangeh noh syndet.
Ka kyrwoh khubor na ka DMHO kala ong ba ka jingsdang ïa ka jingthung kam ïa ki nurse na ka bynta ka MCH Hospital Nongstoiñ kala sdang naduh ka por ba ka ophis ka ïoh ïa ka hukum najrong ha u bnai Jylliew, 2026 khnang ba yn ïoh pyntreikam noh ïa ka MCH Hospital ban shakri ïa u paidbah hadien ka jingïapynbeit lang bad ka Deputy Commissioner, ka ophis DMHO kala thoh sha ka ophis jong u employment exchange ban ai ïa ki khynnah kiba la pass ïa ka GNM bad BSC nursing kiba la pynrung kyrteng (register) bad ka ophis jong ki.
Nangta, la ong ruh ba la bthah ïa baroh ki kyrtong ba la shah jied na ka employment exchange ban phah ïa ki kot ki sla ha ka 11 tarik u Nailur khnang ba ka ophis kan ïoh ban bishar bniah ïa ki.
Shuh shuh ka kyrwoh na ka DMHO ka ïathuh ruh ba ka written eksam la pynlong ha ka 21 tarik u Nailur khlem kano kano ka jingwit, nangta ka thup ki kyrtong bad ki mark ban long kiba la bit ïa ka interview la pyllait ha ka 24 tarik u Nailur bad ki tarik na ka bynta ka interview la buh ha ka 29 bad 30 tarik u Nailur, 2026.
“Nga kwah ban pyntip ruh ba ka recruitment process nurse contractual kan ïaid beit shakhmat,” ong ka DMHO ha ka kyrwoh khubor bala phah da kaba bynrap ba ki bor pynïaid district kin sa peit bad bishar bniah ïa ki jingujor bad ki jingkynthoh ba la mih ha ki rynsan social media.
Shuh shuh kala ong ruh ba ka tnad ka koit ka khiah ryngkat ka bor District ka ïatreilang ban pynlong ïa ka jingthung kam kaba khuid ba suba bad kaba lah ban pynlong ha ka rukom kaba dei katkum ki ain ka sorkar khnang ban ïoh ban pyntrei kam noh kloi kloi bad ban plie ïa ka MCH Hospital Nongstoiñ.
Ka DMHO kala ong ruh ba na ka liang ka tnad ka kyrpad ïa ka jingkyrshan lang jong ki paidbah ban ïatreilang khnang ban ïoh ban pyntrei kam pura ïa ka MCH ban ai ka jingshakri kaba kongsan ïa ki paidbah ka thaiñ.
