Shillong, Nailur 29
U Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar u la ong ba la dep ban pynlong 90.65% ki ‘Hearing’ hapoh ka Special Intensive Revision (SIR) 2026 kaba dang ïaid shakhmat bad la bthah ïa ki ophisar ban pyntikna ïa ka jingpynbeit biang por ïa ki mukotduma kiba dang sah.
U Dr. Tiwari, uba la pynlong ïa ka jingïalang khmih bniah (Virtual Review Meeting) bad ki Deputy Commissioner, District Election Officer, ERO, AERO bad kiwei-kiwei ki ophisar ilekshon nalor ka jingïalang ba kyrpang bad ki seng saiñ pyrthei (ba la ithuh), u la ong ba na ki 21,69,243 ngut ki nongthep ‘vote’ kiba don ha ka ‘Draft Electoral Roll’, la pynmih ïa ki notis na ka bynta 6,51,735 ngut bad la pynpoi sha ki 6,51,066 ngut, katba ki don sa tang 619 ngut kiba dang hap ban pynpoi.
U la pyntip ba haduh mynta, la dep ban pynlong haduh 5,90,784 tylli ki ‘Hearing’, bad la lap ba 910 ngut ki nongthep ‘vote’ kim lah shuh ban thep ‘vote’ ne ban shah kynthup ha ka ‘Final Electoral Roll’ hadien ba la pyndep ïa ka jingbishar kaba biang, katba 19,07,182 ngut ki nongthep ‘vote’ na ka ‘Draft Roll’ la buh na ka bynta ban pynmih ha ka kylla kaba khatduh.
Haba kdew ïa ki jingbthah jong ka Election Commission of India (ECI) ba la pynmih ha ka 26 tarik u Nailur, u Dr. Tiwari u la ong ba ha ki khep ba la pynmih ïa ki notis halor ka ‘No Mapping’ lane ka jingbym biang, ki BLO ba dei peit mynta kin leit jngoh ïa ki ïing ki sem jong kum kine ki nongthep ‘vote’, lum ïa ki kot ki sla ba donkam bad buh ïa ki ha ka ‘ECINET’ ban bishar bniah ki ERO bad ba kum kine ki nongthep ‘vote’ kim donkam ban ïakynduh ïa ki ERO ne AERO na ka bynta ka ‘Hearing’.
U la ong ruh ba lait tang ha ki jingjia ba kyrpang kumba la rai da ki ERO, yn ïaid shakhmat bad ka ‘Hearing’ bathymmai, ka ban pynlong lyngba ka ‘online’, bad u nongthep ‘vote’ u lah ruh ban ai bor ïa uno-uno u dkhot uba rangbah jong ka ïing ban mihkhmat ha ka ‘Hearing’ na ka bynta jong u.
U CEO u la ong ba la pynmih ïa ki jingbthah ban pynkhlaiñ ïa ki jaka na ka bynta ki ‘Hearing’ lyngba ka ‘online’ bad ban pynsuk ïa ki ‘riew tymmen, ki briew kiba don jingduna ha ki dkhot met bad kito kiba ïakynduh jingeh ban leit sha ki ophis, katba la bthah ruh ïa ki DEO ban buh ïa ki ‘Help Desk’ bad ban pynlong ïa ki ‘Special Camp’ na ka bynta ki briew kiba sah ha ki jaka sah miet, ki nongbylla, kiba duna ha ka ïoh ka kot, ki bym don ïing don sem, bad kiwei-kiwei kiba mad ne ïakynduh jingeh-jingjynjar khnang ba kin ym shah iehnoh ha kane kam jied nongmihkhmat.
U Dr. Tiwari u la ong shuh-shuh ba la pdiang bad pynkylla ‘digital’ haduh 23,259 tylli ki aplikeshon ha ka por ba pynthymmai, kynthup ïa 12,624 tylli ki phom 6, 1,616 tylli ki phom 7, 1,590 tylli ki phom 8 ban pynkynriah bad 7,429 tylli ki phom 8 ban pynbeit, bad la bthah ïa ki ophisar ban pyntikna ïa ka jingpeit bniah bad ka jingpyndep ïa ka kam ha ka por kaba biang.
U la pynshai ruh ba na ki 6,51,735 tylli ki notis, 2,22,786 ki ïadei bad ka ‘No Mapping’ bad 4,28,949 ki ïadei bad ka jingbym biang ha ka ‘Mapping’, bad ba ka ‘No Mapping’, ka jingbym biang ha ka ‘Mapping’ lane ka jingpdiang ïa ka notis kam lah da lei-lei ruh da lade ban pyndam ïa ka kyrteng.
Halor ka jingïashim bynta jong ki seng saiñ pyrthei, u la ong ba la thung ïa 1,814 ngut ki ‘Booth Level Agent’ ha kaba 736 ngut ki dei na ka NPP, 393 ngut na ka BJP, 320 ngut na ka VPP, 186 ngut na ka INC, 121 ngut na ka UDP bad 58 ngut na ka AITC.
Haba pynkynmaw biang ba ki briew kiba dei hok bad kiba ki kyrteng jong ki, ki shah iehnoh ha ka por jong ka SIR bad ki samla lem bad ki nongthep ‘vote’ banyngkong ki lah ban aplai ban shah kynthup hapoh ka jingpynthymmai kaba ïai bteng, u Dr. Tiwari u la kyntu ïa uwei-pa-uwei u nongthep ‘vote’ ban peit bad pyntikna ïa ka kyrteng jong u ha ka ‘Final Electoral Roll’ hadien ba la pynmih, da kaba pynpaw ba ka jingdon ïa ka EPIC marwei kam ai hok ïa u briew ban thep ‘vote’ lada ïa ka kyrteng jong u ym shym la kynthup ha ka ‘Electoral Roll’ bad pynskhem biang ïa ka kular ban pyntikna ban ym don uwei ruh u nongthep ‘vote’ uba dei hok u ban sahdien.
