Nongpoh, Nailur 29
Uwei u samla uba dang 22 snem ka rta u la shah kem noh ha ki pulit jong ka thanad Byrnihat ha ka sngi Ba-ar katba u dang wan thied ïa u drok na nongbah Guwahati uba thmu ban die pateng pat ha Shillong.
Utei u samla uba la tip kyrteng kum u David Marwein na ka shnong Wahumlalong, Eastern West Khasi Hills la ïoh ban kem hajan jong ka khyrdop khrong khajna ka NHAI ha 20 Mer, Ri Bhoi District ryngkat bad kawei ka scooty kaba don ïa u number ML05-AH-7002.
Ha ka jingtalasi ïa ka met jong utei u samla, ki pulit kila ïoh ban kurup ïa kumba 9.77 gram u drok Heroin uba la dep ban song bha ha ka synduk sabon.
Utei u samla u la ïathuh ba ki don lai ngut ki paralok kiba pynlum ïa ka pisa kumba T.90 hajar ban leit thied ïa u drok na Guwahati bad ban leit die pat sha nongbah Shillong.
Halor kane ka jingjia, ki pulit ki la register case hapoh ki kyndon jong ka ain Narcotic Drugs and Psychotropic Substances (NDPS) bad ka jingtohkit ban lap dien sa ïa kiwei de kiba donkti ka dang ïaid shakhmat.
