Pynthikna u Bah Sanbor ba ym don satia ki MLA ka NPP ban rung BJP

Shillong, Nailur 29

Haba pynkut syndon ïa ki khubor antad halor ka jingïakynad hapoh ka kynhun synrop ba synshar ïa ka Sorkar Jylla, u Bah Sanbor Shullai, Myntri ka Sorkar u la ong ba ka jingïatreilang hapdeng ka NPP-BJP hapoh ka NDA, ka dang skhem triang bad ki khubor ba ong ba ki MLA ka NPP ki thmu ïasoh sha ka BJP ka dei ka bym shisha.

U Bah Sanbor uba dei u nongïalam ka BJP u la ong ba u la ïoh ïa ka khubor kaba shai na ki nongïalam ka BJP na Delhi halor kane ka kam.

“Kumba la pynthikna da ki nongïalam na Delhi, ka jingïatreilang ka BJP-NPP, ka dang skhem bha. Ki nongïalam na Delhi ki la pynshai ba kam shym don satia kano-kano ka jingïakren ban wan ïasoh ki MLA ka NPP bad ki kmen ban don ha ka Sorkar ba ïalam u Conrad Sangma ha ka Jylla,” la  ong u Bah Sanbor.

U la pyntip ba ka jingïatreilang, kadei kaba khlaiñ bha la ha ka Sorkar Pdeng ne ha ka Jylla ruh kumjuh.

“Naba ka NPP bad ka BJP, ki ïatreilang ha ka Sorkar Pdeng, kiei-kiei baroh ki biang lut hapdeng kine ar party,” u la ong.

Haba ïaroh ïa u Myntri Rangbah u Conrad Sangma, u Bah Sanbor u ong “U CM jong ngi, u dei uba stad bad u la shimkhia bha ïa ka Konstitwensi jong ngi”.

U la pyntip ruh ba ki MLA ka BJP kin sa ïakynduh shen ïa u Myntri Rangbah ban pan ïa ka jingkyrshan na ka bynta ka Konstitwensi jong ki, kaba long katkum ka jingbthah jong ki nongïalam na Delhi.

Haba kren halor ki khubor hamsaia ba saphriang ha ki lad pathai khubor bad social media halor ka jingthmu ïasoh BJP ki MLA NPP, na ka liang u Bah Sanbor u la ong, ba baroh ki khubor ha ki lad pathai khubor bad ki social media, kidei kiba shu thok. Kam shym don satia kano-kano ka jingkren bad ki MLA BJP.

Namarkata, u la maham ba ym don mano-mano ruh na ki nongïalam ha ka Jylla, kiba la ïoh bor ban pynlong ïa kane ka jingïakren.