Shillong, Nailur 29
U President ka NPP Meghalaya Bah Prestone Tynsong uba long ruh u Symbud Myntri Rang-bah ka Jylla ha ka sngi Ba-ar u la ban biang ba ka NPP ka long tylli kawei bad kam don jingma eiei na ka jingkiew bad jingnang pynïar tnad jong ka BJP.
Haba jubab ïa ki jingkylli halor ka jingpynheh ïa ka BJP la kan buh jingma ne em ïa ka NPP, u Bah Prestone u la ong, “Em, ngam ïohi satia ïa kano-kano ka jingma.”
Haba kylli hato don ki MLA kiba thmu ban rung sha ka NPP, u la ong, “Kumba ka long haduh mynta, ym don.”
Haba pynkynmaw biang ïa ka jingïatylli mlon jong ka seng, u la ong, “Kum u President jong ka NPP, nga kwah ban ïathuh ïa phi tang kawei, ka long 101 per cent, 33 ngut ki MLA ka NPP ki long tylli beit kawei. Ngim don kano-kano ka jingïasngewthuh bakla bad ym don ruh uwei uba thmu ban mih na ka NPP.”
Halor ka jingkylli hato ka BJP ka la pan shuki Myntri shuh, u la ong, “Kam don satia kano-kano ka jingbuh kyndon kaba kumta.”
