Shillong, Nailur 30
Ki pulit ryngkat bad ki BSF ki la ïoh ban pynphai noh ïa ki hynñiew ngut ki kynthei sha Bangladesh, hadien ba la ïoh bat noh ïa ki ha Macgangpani, West Garo Hills.
Katkum ka khubor na ki pulit la ong ba ki pulit ka Dalu ki la ïoh pdiang ïa ka ejahar (FIR) na u Debashis Panda, Asst Comdt BSF 22 Bn, kaba ong ba ha ka 28.09.2026 ha ka por kumba 7:50 mynstep, ki shipai BSF ki la thmu ban bat ïa kawei ka auto-rickshaw ba la suba jur ha surokbah NH-217 ha Macgangpani. Hynrei haba kthong, kane ka auto-rickshaw ka la phet sha ka bynta jong ka Tura, da kaba iehnoh shadien ïa ki san ngut ki kynthei kiba la shong ha kane ka auto.
Ha ka por ba la pynlong ka jingtalasi, la ïoh ban bat sa ïa ar ngut ki kynthei, kiba la don ha kawei ka arshaka bad ba la kynnoh pynkit ïa ki da u nong India u Ala Uddin (30 snem) da ka TVS motorcycle ba don ïa u registration number AS01-GS-5629. Kine ki kynthei kiba la shah bat kiba dei ruh ki nong Bangladesh, la ong ba ha kane ka juh ka sngi la pynphai biang ïa ki sha Bangladesh.
Ha kaba ïadei pat bad u Ala Uddin, hadien bym shym la ïoh ki sakhi satar kiba biang pyrshah ïa u, la pyllait noh hapoh ka PR Bond.
