Shillong, Nailur 30
Ka Khasi Students’ Union hadien ba ka la ïoh ïa ka jingujor na ki bun ngut ki briew halor ka jinglum pisa be-aiñ ki pulit Meghalaya ha ka National Highway ha Mawkhanu bad Thangshalai, kumta ka seng ha 30 tarik Nailur, 2026 hapoh ka jingïalam jong u Alerick Kharjana, Education Secretary ka KSU CEC, ka la leit hiar sha Diengpasoh bad Thanglaskai ban jurip bad la lap ba ka la long kaba shisha.
Ki dkhot ka Seng ki la ïoh ring dur ban pynshisha halor kane ka kam bad la lah ban ïohi ba ki pulit ki shim pisa na ka trok bad ka la don ka jingïapynbeit ba baroh ki trok kiba kit ïa ki tiar, ki marpoh khyndew, ki kali kit mar-bam ki hap ban siew sha ki pulit Meghalaya kumba 200 tyngka haduh 500 tyngka kawei ka trok.
Ka Seng ka don ka jingsuba ba ïa kane ka kam la pynbeit da ki heh pulit lym kumta kumno kine ki pulit kin nud ban lum pisa mynmiet bad mynsngi bad ki nongñiah trok ruh ki ai beit khlem artatien namar kumba ka ladon ka jingpynbeit. Ka jingkylli ba ka seng ka kwah ban buh mynta hakhmat ki nongpynïaid ka East Khasi Hills District ka long ba mano ba aibor ïa kine ki pulit ba kin shim pisa na ki trok. Hato u dei u SP Vivek Syiem lane u DC Abhilash Baranwal, IAS lane baroh ar ngut bad lehse ki Myntri jong ka Jylla ruh ki don bynta halor kane ka kam??
Ka Sorkar Jylla ka dei ban pynlong ïa ka jingtohkit ba laitluid halor kane ka kam khnang ban lah ban rat dyngkhong ïa kine ki jingleh bym shong nongrim ne shong aiñ da ki riew bat aiñ. Ka Seng ha kine ki sngi ban wan kin buh ïa ka jingujor ha khmat ki bor pynïaid, namar kum kine ki jingjia ka pyni ïa ka jingbamsap kaba jur hapoh ka tnad pulit bad ka seng ka rat dyngkhong ïa kum kine ki kam bamsap kiba pyntlor ïa ka Jylla ha ka roi ka par ha kaba ki mar bam mar dih ki kiew dor man la ka por.
Ka Seng ka dawa ba dei ban weng mardor ïa u SP ka East Khasi Hills District u Bah Vivek Syiem uba la ailad ïa kum kane ka kam ban jia hapoh ka jingpeit ka jong u bad kumjuh ruh ïa u DC.
Ka KSU ka dawa ba dei ban don ka jingtohkit kaba bniah bad kan dang ïai pynjur ban pynlong ïa kum kine ki jingtalasi wat lada dei ki pulit ne ki briew jong ka aiñ kiba leh donbor.
