Nongstoiñ, Nailur 30
Ha ka step jong ka 30 tarik mynta u bnai, u MDC ka Nongstoiñ u Dr. Juristman Ïawphñiaw ha ryngkat ki nongbud ki jong u, kila leit biang sha DC ophis Nongstoiñ da ka jingthmu ban ïakynduh ïa ka DC ban ïakren biang halor ka jingpynïaid ïa ka interview ‘staff nurse’ hynrei kila shah khang lynti noh ha ki bor pahara hakhmat ka khyrdop shwa ban rung sha phyllaw ka ophis DC.
Ha katei ka jingshah khang ban rung, na ka liang u MDC u la pyrshang ban ïakren bad ki bor pahara kiba don hakhmat ka khyrdop DC bad kumjuh ïa ki magistor ba ki dei ban ïathuh sha ka DC ba ki kwah ïakynduh ban ïoh ïakren bad ka DC hashwa ba ka interview kan sdang hynrei ym shym la shah satia ïa ki ban rung hynrei la phah ap ha khyrdop shuwa ban rung sha ka ophis DC.
Ym tang katta, ha katei ka jingbym shah ban rung, u MDC u la sei ïa ki kot ki sla kiba u la kam ba ki dei ki sakhi sabut jong ka jingïathoh message ryngkat ka ‘transaction’ kaba pyni ba ka don ka jingïathong pisa ha kaba ïadei bad ka jingpynrung kam ha ki post ‘staff nurse’ hapoh ka MCH Hospital Nongstoiñ.
Kumta hadien ka jingap kila pyrshang ban tan jubor ïa ka khyrdop ophis DC ha kaba kila ïoh lad ruh ban ïa rung shapoh bad kala don ruh ka jingïapynibor shiphang bad ki bor pahara hynrei la lah ban tem noh pat hapoh ka phyllaw jong ka ophis DC hadien ba ki majistor kiba don ha katei ka jaka ki la pynshai bad ïakren bad u.
Shuh shuh hadien ba ki la ïai ap, u MDC u la ïoh ïa ka shithi ïa kaba ka Deputy Commissioner kala phah lyngba u majistor ban aiti sha u bad hadien kane ki la leit phai noh.
U Dr. Juristman Ïawphniaw haba kren ha ki lad pathai khubor u la ong, “Ngi hap ban shim ïa kine ki sienjam kiba eh ha ka jingim ka jong ngi, ngim ju long kumne kumba ju long ha kiwei ki por hynrei ka por kam shah shuh ïa ngi ba ngin shong mynthi ngim banse ngi hap tur jubor ïa ka khyrdop.”
Shuh shuh u Dr. Juristman u la kubur ruh ba kala don ka jingïatyngkhuh bad ki pulit hynrei u kyrpad tang kawei, ba kiei-kiei baroh ki dei ban ïaid beit.
“Naduh ba sdang ngi wan da ka lynti kaba suk hynrei kim shym la kwah, ki pan ïa ka ding, ngi ai ka ding tang khyndiat hynrei u paidbah u la pluh,” ong u Dr. Juristman da kaba u la bynrap ban ong wat ju pynpluh ïa ka Nongstoiñ.
U MDC u la pynpaw ruh ïa ka jingai khublei ïa ka DC ka West Khasi Hills, kaba la ai ïa ka shithi, kaba pyni shai ba la thaw ïa ka komiti tohkit (formal inquiry committee) kaba yn khlieh da u Bah H. Kharkongor, MPS, Superintendent of Police (SP) ka West Khasi Hills District lem bad u Bah E. Lyngdoh, MCS, AC & Executive Magistrate, West Khasi Hills District halor ka jingmih ki jingkynnoh thong pisa ha kaba ïadei bad ka jingpynrung kam ha ki kam ‘staff nurse’ hapoh ka MCH Hospital Nongstoiñ.
Shuh shuh u MDC u la ïathuh ba ha kane ka shithi la pynpaw ruh ba yn ym pynmih lane pyllait ïa ka risol lane ka thup kyrteng kaba khatduh jong kiba pass (final selection list) tad ynda ka jingtohkit kala dep.
U la ong ruh ba watla na ka liang jong u bad ki dkhot ka VPP ki la pyrshah ban tuklar ïa kane ka kam hynrei ka Personal Interview ka dang ïaid shakhmat namar ki ong ba kim pat ïoh ïa ka jingbthah na ki bor ba halor ban pynsangeh.
U Dr. Juristman u la ong ruh ba na ka liang ka VPP Nongstoiñ, Mawshynrut bad Rambrai bad jong ka West Khasi Hills baroh kawei kala pyrshang katba lah hi ban tehlakam ïa kine ki jyrwit jyrwat kiba ïadei bad ka thung kam thung jam.
U la bynrap ruh ban ong, “Ngi ngeit ba kine ki jingsdang ki jong ngi kin nym kut hangne hynrei haduh ba ngin da jop, ïa kaei kaba ngi la sdang.”
