Shillong, Nailur 30
Da kaba rakhe ïa ka sienjam kaba khraw ha ka jingtbit ba kynsai ha ka thohdur, ka thoh ka tar bad ka sur rwai sur tem, ka Riti Academy of Visual Arts ka la pynlong ïa ka rakhe lyngkhuh snem ba 35 Snem da kaba ainam da ka khusnam Paila 2026 kaba long ha ïingsah u Lat ka Jylla.
Kane ka jingïalang pynkup burom la pynphuh pynphieng da u Lat ka Jylla Meghalaya, u CH Vijayashankar, kum u Kongsan. La synran lang ruh da ki kher ki mer rangbah ka Sorkar Jylla kynthup ïa u HC Choudhary, Additional Chief Secretary jong u Lat; u Bah FR Kharkongor, IAS, Principal Secretary ka Sorkar Jylla bad ka Kong Camelia Doreen Lyngwa, Director ka tnad Arts and Culture. Ha kane ka sngi la don lang ruh da ki dkhot ka synjuk mattithaw, u nongkittiensyiem ka Sorkar India ba la shongthait bad nongkynpham ka Riti Academy Bah R.V. Warjri, lem bad u Chief Creative Director ka Riti Academy of Visual Arts Bah Raphael Warjri.
Haba kren ha kane ka sngi, u Lat u la pynpaw ïa ka jingsngewnguh ïa ka jingtrei shitom ba kynsai jong ka Riti Academy ha kaba ithuh, kyntiew, bad pynkup burom ïa ki riewtbit ha la ki sap ha ki bynta bapher bapher. Haba kynthoh halor ka jingdonkam jong ki samla, u Lat u la ong ba ki samla ha kine ki sngi ki kham don sap shikatdei eh palat ïa ki riewtbit ba rangbah ha baroh ki tnad ka sap thoh bad thaw, bad u la pynshongnia halor ka jingdonkam ban kynthup lem ïa ki ha kine ki rukom pynkup burom.
Kawei na ki bynta kiba kongsan jong ka sngi ka long ka jingsam ïa ki khusnam kynmaw tympang, ban burom ïa ka nam jong ki riewtbit ba kynsai ha ka imlang sahlang, bad la sam da u Lat ryngkat ki bahaïing jong kitei ki riewkhraw ba ainam ïa ka khusnam. Ïa ka khusnam Prithpal Singh Sehdave ‘Ladi’ Memorial Award (Visual Arts) la pynkup ïa ka Lalhming Mawii na Mizoram. Ka khusnam Crystal Gayle Memorial Award (Music) sha u Bah Royalborn Suting na ka Khmih Creative Society. Ka khusnam Sumar Sing Sawian Memorial Award (Performing Arts) la ïoh nam da u Bah Janai Nongkynrih. Ka khusnam S. Quotient Sumer Memorial Award (Media) da u Bah Aaron Lyngdoh. Ka khusnam Rana Kharkongor Memorial Award (Music) la ainam ïa u Bah Shibor Mawkon na ka Pynter Orchestra.
Ha katei ka sngi, u Bah F.R. Kharkongor, IAS u la pynkynmaw ïa ka jingtrei ba kynsai bad ka jinglah jong ka Riti Academy ym tang ha kaba pynkup burom ïa ki nongïoh khusnam, hynrei ruh ha kaba pynurlong ïa ki kam shna dur bad thohdur kiba khraw ha kylleng ka Jylla. U la pynkynmaw kyrpang ïa ka jingshna ïa ki dur ki dar ha Information Technology Park ha New Shillong.
Da kaba pynshisha ïa kane, u Bah R.V. Warjri u la pynleit jingmut ha ki dur kynmaw kiba la shna da ka kynhun thohdur jong ka Riti Academy ban pynkynmaw ïa ki Syiem bad khlawait jong ka Thma Anglo-Khasi (1829-1839). Kitei ki jingtei ïa ki motdur Tirot Sing Syiem, Bormanik Syiem, bad Sngap Sing Syiem-ha kaba uba jrong duh u poi haduh 24 phut-ki la long mynta ki motdur kiba jrong tam ha ka Jylla baroh kawei.
