Shillong, Nailur 30
Ka ilekshon sha ka Garo Hills Autonomous Dis-trict Council (GHADC) mynta kan don ïa ka thup kyrteng ki nongthep ‘vote’ kaba dei beit thik tang na ka bynta ki ‘riewlum khlem da kynthup shuh ïa ki bym dei ‘riewlum ne bar-jylla.
Kane ka long hadien ba u Lat ka Jylla, u C.H. Vijayashankar u la ai ïa ka jingmynjur halor ka jingpynkylla ïa ki kyndon thep ‘vote’ jong ka ‘Council’.
Ki tyllong khubor ba tikna ki ïathuh ba u Lat u la mynjur ïa kane ka jingpynkylla ha ka Sngi Ba-ar, 29 tarik u Nailur.
Hadien kane ka jingmynjur, ka Sorkar Meghalaya ha ka Sngi Balang ka la pynbna ïa ka ‘GHADC (Second Amendment) Rules, 2026’ ha ka ‘Gazette’ jong ka Jylla.
Kane ka jingpynbna ka pyntreikam mardor ïa ki jingpynkylla haba ïadei bad ka ‘Assam and Meghalaya Autonomous Districts (Constitution of District Councils) Rules, 1951’.
Hapoh kane ka saiñdur, ka ‘Rule 8’ ka pynlong ïa ka kyrdan ‘Scheduled Tribe’ kum ka bynta kaba kongsan na ka bynta ban ïakhun ïa ka ilekshon ha GHADC, ka ‘Rule 128’ ka kdew ïa ka kyndon ST na ka bynta ki nongthep ‘vote’, bad ka ‘Rule 129’ pat ka ailad ban pynkhreh ïa la ka jong ka thup kyrteng ki nongthep ‘vote’ na ka bynta ka ‘Council’ – da kaba pynduh noh ïa ka jingpyndonkam ïa ka thup kyrteng ki nongthep ‘vote’ jong ka Ïingdorbar Thawaiñ.
Ïa kane ka sienjam la shim hadien ba ka GHADC ka la mynjur ïa ka ‘Amendment Bill’ ha ka 10 tarik u Nailar, hadien ba ka la ïoh ïa ka jingmynjur na u Lat ha ka 6 tarik u Nailar ban wanrah ïa ka hapoh ka Dorbar. Ka jingpynkylla kaba hashuwa ïa ka ‘Rule 8’ la mynjur da ka ‘Council’ ha ka 23 tarik u Lber mynta u snem.
Kitei ki jingpynkylla ki long hadien ba ka Meghalaya High Court ka la pyndam noh ïa ka ‘Executive Notification’ kaba kham hashuwa jong ka GHADC kaba la pynlong kongsan ïa ka syrnot ST na ka bynta ki kyrtong, halor ka nongrim ba hap ban leh lyngba ka rukom thaw aiñ. Ka ‘Council’ ha u bnai Jymmang, 2025 ka la thaw ïa ka komiti ban khmih bniah ïa ki kyndon ilekshon bad ban thaw ruh ïa ka thup kyrteng ba kyrpang.
Na ka liang u Myntri Rangbah ka Jylla, u Conrad K. Sangma u la pynpaw biang ïa ka jingkut jngmut jong ka Sorkar ban ïada ïa ki hok jong ki trai-ri trai-muluk, da kaba ong ba ka synshar-khadar bad ka jingthaw ïa ki polisi ka dei ban don ka jingkitkhlieh ïa ki jaidbynriew kiba ki thmu ban shakri.
Da ka jingpynjlan ïa ka samoi treikam jong ka GHADC kaba mynta haduh ka 18 tarik u Risaw hadien ba la pynkynriah noh ïa ka jingthep ‘vote’ kaba dei ban long ha u bnai Ïaïong, 2026 namar ka jingkulmar ha Ri-lum Garo, ka jingpynkhreh ïa ka thup kyrteng ba kyrpang (bathymmai) mynta kan rai pat ïa ka por na ka bynta ka ilekshon ban wan sha ka ‘Council’.
