Amlarem, Nailur 30
U Myntri ka tnad Pule Puthi ka Jylla u Bah Lahkmen Rymbui ha ka 30 tarik Nailur u la plie paidbah ïa ka ïing skul bathymmai jong ka Padu Bah Government Lower Primary School kaba don 7 kamra ba la tei hapoh ka DSEL Scheme 2023-2026.
U Bah Lahkmen Rymbui haba kren ha ka jingïalang u la ong, ka jingplie ïa kane ka ïingskul ka pyni ïa ki jingpyrshang ba bteng jong ka Sorkar hapoh ka jingïalam jong u Myntri Rangbah ka Jylla u Conrad K Sangma ban pynkhlaiñ ïa ka pule puthi bad ban ai ki lad ki lynti kiba kham bha ïa ki khynnah.
U la ïathuh ïa ki jingpyrshang jong ka Sorkar ban plie ïa ki jaka pule ha kylleng ki jaka jong ka Amlarem Sub-Division, kynthup ka jingpynkhlaiñ ïa ki jaka pule kiba kham shalor bad ka jingdon jong ki rukom pule bapher-bapher.
U la kren ruh halor ka jingpynroi ïa ki lad pule puthi lyngba ki skul RMSA kiba don ha Shkenpyrsit, Trangblang bad Umladkhur, bad ka jingthmu ban plie ïa ka Secondary Education ha Jong U Chen bad Kharkhana, ka ban ïarap ïa ki khynnah skul na ki jaka ba jngai ban ïoh ïa ka jingpule kaba kham jan sha la ïing.
U Bah Lahkmen u la ban jur ba ka pule puthi kam dei ban long tang ha ki kyrdan pule hynrei ka dei ban ïarap ruh ïa ki samla pule ban kyntiew ïa ki sap ki phong, bad ka jinglah ban shaniah ha lade.
U la kren ruh halor ka Community Integrated Skill Learning, kaba thmu ban pynrung lang ïa ka sap ka phong ki khynnah ha ka Physical and Health Education Curriculum, ha kaba 50% ka marks yn ai sha ki khynnah skul kiba shim ïa kano-kano ka sap na ki bahaïing hasem ne ki shnong ki thaw.
U Bah Lahkmen u la pynsngew ruh ïa ki jingpyrshang jong ka Sorkar, kum ka CM-Elevate bad ka Hello Meghalaya, kiba ai lad ïa ki samla ban kyntiew ïa ki sap ki phong jong ki bad ban wad ïa ki lad kamai bad seng kam seng jam.
Haba khot ïa ki nonghikai ba kin nang pynjanai shuh shuh ïa ki rukom hikai jong ki, u Bah Lahkmen u la kdew sha ka Meghalaya Teacher Training Academy bad u la ban jur ïa ka jingdonkam ban ïai bteng ban ai jinghikai bad kyntiew ïa ki nonghikai ha ka kam.
U la pynshlur ruh ïa ki samla ban wad ïa ki lad ki lynti kiba palat ïa ka kam Sorkar bad ban pyndonkam ïa ka jingnang jingstad, bad ka sap ka phong ba ki don ban long kiba lah ban shaniah ha lade.
Shwa kane ka Kong Rammon Mukhim kaba dei ka Headmistress jong ka Padu Bah Government Lower Primary School kala pynsngew ïa ka histori lyngkot jong ka skul kaba la seng naduh u snem 1954 da ki mishoneri Presbyterian na ri Welsh.
Ha kaba sdang kane ka skul ka treikam kum ka Basic School bad hadien la pynïaid da ka JHADC bad la shimti noh da ka Sorkar Jylla ha u snem 1994.
Ka la pyntip ba kane ka skul mynta ka don saw ngut ki nonghikai bad 95 ngut ki khynnah skul.
Ka skul ka la aiti ruh ïa ka dorkhas ha u Myntri na ka bynta ban pynïoh ïa ka kamra klas ba kham heh, ki paiñkhana na ka bynta ki khynnah shynrang bad kynthei bad ban pynroi ïa ka madan ïalehkai.
Kiwei kiba la ai jingkren ki long u Bah Het Pohthmi, MDC, War West, ka SDSEO Amlarem ka Kong W. Nonghuloo, u nonghikai ba la shongthait Bah Ephriam Pohlong, bad ka Headmistress Upper Primary School ka Kong Liewliness Pohshna nalor kiwei kiwei.
La pynphuh pynphieng ïa ka jingïalang plie, da ki jingshad na ki khynnah kane ka skul.
