Shillong, Nailur 30
U Symbud Myntri Rangbah ka Jylla Bah Prestone Tynsong u la ong ba ka Sorkar Jylla kala ïengskhem ba ki Facilitation Centre ki dei ban don ïa ki Food Court ban pynthikna ïa ka jaka kaba biang ïa ki kali ba kin pynïeng bad ba ki nongleit nongwan kin ïoh bam jingbam.
“Ka nongrim jong ngi ka long kaba shai. Ki Facilitation Centre ka hap ban don bad ryngkat bad ka dei ruh ban donlang ka Food Court. Baroh ar ki dei ban ïadonlang khnang ba kin don ki jaka kiba biang ba ki kali kin pynïeng bad ba ki briew kin ïoh ban bam jingbam, dih sha bad kiwei-kiwei,” ong u Bah Prestone.
U la ong ba la bthah ïa ki bor pynïaid District ban pynthikna ba ki jingjurip kin long kiba hun.
“Ngi la bthah ïa ki bor pynïaid District bad lada ki don kano-kano ka jingartatien lane jingbym hun halor ka jingjurip ba nyngkong, ngi lah ban leit jurip biang sa ar ne lai ne saw sien, ngim don jingeh ïa kata. Lada ki jingsngewkhia ki jong ki, ki long bad kiwei ki tnad, ïa kata ruh lah ban leh. Ngi ieh ha ka jingstad jong ki bor pynïaid District ban pynthikna ba ki jingjurip kin long kiba hun,” u la ong.
Haba kylli pat halor ki jingkawang petrol bom dang shen bad ka jingsniew ka suk ka saiñ, u Bah Prestone u la ong, “Nga tharai ka jingkylli kam don jingmut shuh. Ngan ym jubab ïa kata. Ha ka jingshisha ngi la leh lut ïa kat kiba dei ban leh, kumta ngan nym ong eiei shuh”.
