Shillong, Nailur 30
U Symbud Myntri Rangbah ba khmih ïa ka tnad Kam Pohïing Bah Prestone Tynsong u la maham ba ka aiñ kan shim la ka jong ka lynti pyrshah ïa u MDC ka VPP na Nongstoiñ, uba la rung jubor bad pynthut ïa ka interview thungkam nurse ka MCH Hospital, Nongstoiñ.
U Bah Prestone u la ong ba kano-kano ka jingkynnoh kam ai bor satia ïano-ïano ruh ban leit pynthut ïa ka interview kaba dang ïaid.
“Haba phi sei ïa ki jingkynnoh, sngewbha wat pynthut pat ïa kano-kano ka interview. Ai ba ka interview kan ïaid shakhmat. Shah ïa ki kyrtong kiba la shah khot, namar da kaba leh kumne phim ïoh eiei,” ong u Bah Prestone.
U la ong ba ka Sorkar kala sdang ban wad ne pynshisha ïa ki jingkynnoh kiba la mih. “Naba ki jingkynnoh kila mih, ka jingpynshisha bad ka jingtohkit kala ïaid. Ngin sa pynshisha bad tohkit ïa ka. Ngi donkam ban tip ïa ka jingshisha. Shisien ba la pyndep ïa kane, ngin sa shim ïa ka lynti jong ka aiñ,” ong u Bah Prestone.
Haba ïai ban ïa ka nongrim jong ka Sorkar halor ka thungkam thungjam, u la ong, “Naduh ka sngi ba nyngkong ngi long kiba pyrshah jur ïa ka jingleh thok ha ka kam thungkam”.
Haba kylli la kan don ka jingpynshitom ïa u MDC, u Bah Prestone u la ong, “La ki dei ki MLA, MDC ne MP, katba phi dang dei u nongshong shnong ka Jylla lane ka Ri India, phi hap ïaid katkum ka aiñ. Kumta ka aiñ kan shim la ka jong ka lynti”.
