Shillong, Nailur 30
Ka tnad Labour ka la maham ban pynshitom katkum ka aiñ namar ki kam runar hadien ba ka la lap ïa ki syrnot pynrung kyrteng nongbylla bar-jylla kiba thok bad ki ‘slip’ pynshisha kiba la pyni ha ki khyrdop talasi kiba don ha kylleng ka Jylla.
U Labour Commissi-oner, u Bah Banteilang Kharshandi, ha ka kyrwoh ba la pyllait ha ka Sngi Balang, u la ong ba kum kane ka jingpynkylla ha ryngkat ka jingthmu ban leh thok ka lah ban ïalam sha ka jingpynshitom katkum ka kyndon 336 jong ka ‘Bharatiya Nyaya Sanhita’.
Kane ka jingmaham ka wan ha ryngkat bad ka jingpynkynmaw biang ïa ka ‘Meghalaya Identifi-cation, Registration (Safety & Security) of Migrant Workers (MIR SS) Act & Rules 2020’, kaba bthah ban pynrung kyrteng ïa uwei-pa-uwei u nongbylla sngi bad ban ai ïa la ka jong ka ‘Card’ pynrung kyrteng.
“Ka bai aplikeshon ka long sanphew tyngka,” la ong ka kyrwoh bad bynrap ba ki ïa aplikeshon dei ban phah lyngba ka ‘Online’ sha u ‘Registering Officer’ ba dei peit lyngba ki ‘portal’ jong ka Labour Commissioner, ‘Invest Meghalaya’, ‘Meghalaya State Public Service Delivery Commission’, ki CSC lane ki ‘Help Desk’ ha ki ophis ka tnad Labour ha ki distrik bapher-bapher.
Hapoh ki kyndon ba la pynkylla thymmai jong u snem 2026, ki kot ki sla kiba donkam ki kynthup ïa ka ‘Voter ID’, laisen ñiah kali, ‘PAN’, ‘BPL Card’ lane kino-kino kiwei pat ki kot Sorkar ha ryngkat u ‘Aadhaar’, nalor ka jingpynshisha na ki pulit. Ïa ka jingpynshisha ba shipor yn leh lyngba ka CCTNS bad ka jingpynshisha kaba khatduh dei ban pyndep da ki pulit hapoh 30 sngi.
Ka ‘Card’ ka treikam haduh 179 sngi bad ka aplikeshon pynthymmai dei ban phah ym duna ïa ka 30 sngi hashuwa.
Shuh shuh ka tnad ka la ong ba ki nongai kam bad ki kontraktor kiba pyntrei da ki nongbylla ki bym pat pynrung kyrteng kin ngat ha ka jingpynshitom kaba T.10,000 na ka bynta ka jingpynkheiñ aiñ kaba nyngkong, T.25,000 na ka bynta kaba ar, bad na ka bynta kaba lai bad kaba hadien, haduh T.1 lak ka jingdaiñ kuna lane lai bnai ka jingset patok ne baroh ar.
