Mawkyrwat, Nailur 30
Ki paidbah nongshong shnong ka shnong Nongjri ha ka nohphai sngi jong ka 29 tarik u Nailur 2026 ki la lap ïa ki artylli ki metïap kiba la pyut kiba dei jong ki shi jur na ka shnong Nongjri, South West Khasi Hills District, kiba la jah naduh ka 26 tarik u Nailur 2026.
Ïa kitei ki arngut la tip kyrteng kum u Kop Lapang (32 snem) na ka shnong Umsaw Ri-Bhoi District bad ka Aijingsuk Kharbani (23 snem) na Pongkung, East Khasi Hills District.
Katkum ka khubor na u Superintendent of Police ka SWKHD Bah B. Jyrwa, u la ïathuh ba kitei ki shijur ki la jah naduh ka 26 tarik Nailur, 2026 ha ka por kumba 3:00 eiei janmiet katba ki dang leit kai sha ïew Nongjri bad naduh katei ka sngi, kim shym la wanphai ïing shuh.
U Bah B. Jyrwa u la ïathuh ruh ba ha ka 28 tarik u Nailur, 2026, ki pulit ka Mawsynram ki la ïoh pdiang ïa ka FIR halor ka jingjah jong ki bad la pyntip ruh sha u OC ka thanad Nonghyllam, bad ki pulit ki la pynlong ïa ka jingwad bniah ha ki bynta jong ka shnong Nongjri, hynrei ym shym la lap ïa ki bad dei haduh ka nohphai sngi jong ka 29 tarik ba la lap noh ïa ka metïap jong ki bad hadien kata ki bahaïing hasem ki la wan bad pynshisha ïa ki ar ngut. U SP u la ïathuh ruh ba namar ka jinglong pyut jong kitei ki ar tylli ki metïap, ïa ka post-mortem la pyndep ha katei ka jaka bad hadien kata la aiti noh ïa ki metïap sha ki bahaïing hasem ban pyndep ïa ka jinglehniam ba khatduh.
U la ïathuh ba ka jingtohkit kaba kham bniah ka dang ïaid shakhmat ban pynthikna ïa ki jingshisha bad ki jingjia kiba ïadei bad ka jingïap jong ki.
