Shillong, Nailur 30
Haba mad ïa ki jingkynnoh ba don ka jingleh bym hok ha ka jingthung kam ïa ki Staff Nurse ha MCH Hospital, Nongstoiñ, ka Deputy Commissioner ka West Khasi Hills ka la bthah ban pynlong ïa ka jingtohkit kaba pura bad pynsangeh noh ïa ka jingpynbna result.
Ka Deputy Commissioner ka Hema Nayak, haba pyntip sha ka VPP State Youth Wing ha ka sngi Balang, ka la ong ba ïa ka jingujor kaba la ïoh ha ka 28 tarik u Nailur la shimkhia bha.
Ka DC ka la ong ba la thaw ïa ka Inquiry Committee ha kaba u Superintendent of Police u Bah H. Kharkongor bad u AC bad Executive Magistrate E. Lyngdoh kin lamkhmat ïa ka jingtohkit ban pynshisha ïa ki jingkynnoh bad ban pynthikna ïa ka rukom treikam kaba hok.
Da kaba pynksan ba ka jinglong hok, ka jinglong kaba shai ki long ki bym lah ban ïapeiñ, ka Nayak ka la ong ba kano-kano ka kam bamsap ne ka jingdawa be-aiñ yn sa leh pyrkhing bha katkum ka aiñ. Kum ka jingïada shipor, ka bor synshar ka la rai ban nym pynmih ïa kano-kano ka ‘result’ ne ka thup jied ba khatduh tad haduh ban da dep ka jingtohkit bad ban pynbeit ïa ka kam.
Ka ophis ka la pynmih ruh ïa ka jingpynbna ban maham ïa ki kyrtong bad ki paidbah ba kim dei ban ngop ha ki nongïalam bakla bad la kyrpad ïa ki kyrtong ban pyntip mardor ïa kano-kano ka jingdawa kaba kum kata sha ka bor synshar ne ka kynhun tohkit ha ka por treikam.
