Shillong, Nailur 30
Ka Voice of the People Party (VPP) ka la pynksan ïa ka jingwan tuklar jong u MDC ka Nongstoiñ u Bah Juristman Iawphniaw bad ki dkhot jong ka seng ha ka jingpynrung thungkam Staff Nurse ha Nongstoiñ, da kaba pynpaw ba ka la mih hadien ba ka bor synshar District kam shym la leh eiei halor ka jingujor.
Ha ka jingpynlait khubor ha ka sngi Balang, u nongaiktien ka VPP u Bah A.W Rani u la ong ba ka seng ka la shimkhia ïa ka jingkren jong ka bor synshar District West Khasi Hills halor ka jingpynthut ïa ka ‘interview’ kaba la long ha ka 29 tarik u Nailur, hynrei u la pynshai ba katei ka jingleh kam shym la jia khlem da ai jingmaham lypa.
U Bah Rani u la ong ba ki jingkynnoh ba ki don ki jingbym ïahap ha ka rukom thungkam la dep ban buh hakhmat ka Deputy Commissioner ha ka 17 tarik u Nailur ban eksamin, hynrei la shah ïa ka ‘interview’ ban ïaid khlem da pynbeit ïa ki jingeh, kaba la pynbor ïa u MDC bad ki dkhot ka seng ban tuklar ban pynsangeh ïa ka rukom thungkam katba ki jingkynnoh ym lah ban pynbeit.
Haba pynkynmaw biang ba ka seng kam pyrshah ban thung ïa ki Staff Nurse kiba dei hok, u Bah Rani u la ong ba ka jingdawa ka long ban ïoh ïa ka lad kaba mar ryngkat bad kaba hok na ka bynta uwei pa uwei u kyrtong. U la ong ba ka kam paidbah kam dei ban shah ktah ha ka pisa.
Ka VPP ka la dawa ba dei ban pynlong ïa ka jingtohkit kaba shai bad kaba khlem shah liang halor ki jingkynnoh, kynthup ïa ka jingpynshisha ïa ka “audio recording” bad kiwei-kiwei ki tiar ba la aiti, bad ba ka jingpynrung kam ka dei ban sdang biang tang hadien ba la bishar bniah ïa ki jingujor bad ka jingshaniah jong ki kyrtong bad ki paidbah ka la ïoh biang.
