Shillong, Nailur 30
Kum shi bynta ban nang pynjur ïa ka jingïakhih haba ïadei ka jingdawa ban weng ïa u Advocate General u Amit Kumar, ki muktiar ka Jylla Meghalaya ki la shim ïa ka rai ban ‘boycott’ ïa baroh ki kam jingbishar naduh ka 01 tarik u Risaw.
Ka Joint Executive Committee jong ka High Court of Meghalaya Bar Association bad ka Shillong Bar Association ki la shim ïa kane ka rai ha ka jingïalang ba kyrkieh kaba la long ha ka sngi Balang, ha kaba ki pynpaw ba ka Sorkar Jylla kam shym la lah ban burom ïa ka jingtrei jong ki.
Ka Committee ka la kdew ba hadien ka jingïalang paidbah jong ki Bar Association ba la long mynha ka 24 tarik u Nailar, ha kaba ki la dawa da kawei ka sur ban weng noh ïa u Amit Kumar, katba u Symbud Myntri Rangbah ka Jylla ha ka 2 tarik u Nailur bad u Myntri Rangbah ka Jylla ha ka 16 tarik u Nailur ki la pynthikna ba u Amit Kumar un ym mihkhmat ïa ka Sorkar ha kano-kano ka jingbishar.
Wat hapdeng ka jingpynthikna, ka kynhun ki muktiar ka la ong ba u Amit Kumar u dang ïai bteng ban leit mihkhmat na ka bynta ka Jylla hakhmat ka High Court bad ka District Court ha Shillong bad u la leit mihkhmat ruh wat hakhmat ka Commercial Court ha Shillong ha ka 30 tarik Nailur.
Ki muktiar ka Jylla ki shim ïa kane kum ka jingpyrshah bad ka jingbym kheiñ snep ïa kaba u Myntri Rangbah u la dep ban pynthikna bad kaba la ïa sngewthuh jingmut ba ka kynhun ka la dep ban ïasoi. Ka komiti ka la ong ba kane ka long kum ka jingpynjah burom ïa ka kynhun ki muktiar baroh kawei. La ong ba katei ka kam ka ïadei bad ka jingpynbeit ïa ka jingtreikam jong ka ophis jong u Advocate General bad ban ïada ïa ka bha ka miat bad ka burom jong ki muktiar bad kumta la rai ban sangeh na ka jingtreikam ha ka Jylla baroh kawei, lait noh tang ïa ka jamin bad ki kam kiba kyrkieh eh.
Ka kynhun ki Bar Association kan pynlong ruh ïa ka jingïaid rally ha nongbah Shillong ha ka 5 tarik Risaw bad kan sa pynphriang ïa katei ka jingpynbeit kaba la pdiang da kawei ka sur, sha baroh ki Bar Association ha ka Jylla ba kin bud ryntih.
