Shillong, Risaw 01
Ka tnad Pulit kala pynbeit bniah bha ïa ka kam pahara bad ka jingpynïaid kali na ka bynta ka jingwan u Myntri Kam Pohïing ka Ri u Amit Shah ha Shillong ha ka 4 bad 5 tarik Risaw na ka bynta ka jingpynkup burom Presidential Colours.
“La pynkhreh bniah bha na ka bynta ka jingwan u Amit Shah, ka ban long ha ka 4 bad 5 tarik Risaw, bad u SP Traffic un sa pynmih ïa ki jingbthah halor ki surok ba kin ïaid kali bad ban kiar, ka por, khnang ba kan pynduna katba lah ïa ka jingktah ïa u paidbah,” ong u Superintendent of Police (SP) ka EKH Bah Vivek Syiem ha ka sngi Palei.
“Ngi la ïashong pyrkhat bha halor ka jingpynïaid kali namar ka dei ka jingeh kaba khraw tam ha ka leit ka wan, ka jingïaid ki kali,” u la ong.
Halor ka jingbuh bor pahara, u la ong, “Ka jingpynbeit kaba bniah la pynkhreh haba ïadei bad ka jingpahara bad ki ‘tactical team’ bad ki unit bapher-bapher kila wan, ka jingdon ki pulit ban pahara kala kot sha ka 1500 ngut”.
U Amit Shah un aiti ïa ka khusnam Presidential Order sha ka tnad Pulit ka Jylla, kawei na ki tnad Pulit ha ka thaiñ Shatei Lam-Mihngi ka ban ïohpdiang ïa kane ka burom.
