Shillong, Risaw 01
U Superintendent of Police (SP) ka East Khasi Hills Bah Vivek Syiem u la hukum ban pynlong ïa ka jingtohkit kaba bniah hadien ba ka Khasi Students’ Union (KSU) ki la ïoh ring dur ïa ka jingkynnoh lum pisa beaiñ ki pulit na ki trok ha surok National Highway ha Mawkhanu bad Thangshalai.
La ong ba ki trok kiba kit marbam, marpoh khyndew bad kiwei kiwei, ki hap ban siew haduh T.200 haduh T.500 kawei ka trok ha ka sem bala pynïeng bad don da ki pulit ha kine ki artylli ki jaka.
Haba kynthoh halor ki durkhih (video) bala saphriang ha ki rynsan social media, u Bah Vivek u la ong, “Hadien ba nga la ïoh jingtip hynnin ka sngi shaphang kine ki video ha social media ba ka don ka jingleit talasi da ka KSU bad ha kaba kila kynnoh ba ka don ka jinglum pisa beaiñ, nga la phah mar mar ïa u SP (City) Bah Dangsan Khyriem bad ha kaba la sdang ïa ka jingtohkit”.
U SP u la ong ba ki pulit langrut kila buh ha kine ki sem ha ka jingshisha ki dei na ka bynta ban peit bad ïaid pahara bad ban pynthikna ïa ka jingshngaiñ jong ki trok naduh ka por janmiet haduh da miet, hadien ba ka la don ka jingkyrpad na ki association jong ki nongñiah trok halor ka jingjia kam lute ba man ka por.
Ha kajuh ka por, u SP u la kubur ba don ka jingleh tam.
“Da kaba peit ïa ka durkhih, kaba pyni ba ki nongñiah trok kila leit ban siew pisa ha kine ki sem, ka jingpeit bniah ki pulit bad jingdon ki pulit kam shym la don satia. Lada phi peit ïa ki jingtalasi ha Shillong, ka long kaba leh hakhmat u paidbah bad kaba shai, ki briew ryngkat ki tiar ïaleh bad ki jingker kiba paka,” u la ong.
“Da kaba peit ïa kito ki durkhih, ka jingpeit bniah kam i ïahap satia, ka don katto katne ka jingsuba don eiei,” u la ong.
Shuh shuh u SP u la pyntip ba ïa ki pulit langrut kiba donkti yn sa sospon na ka kam ban pynthikna ba ka jingtohkit kan long kaba khuid.
U la ong ruh ba ka Transfer Committee jong ka District kan sa shim rai mynta ka janmiet la kan don ne em ka jingpynkynriah kam ïa u Officer-in-Charge jong ka thaiñ.
Haba ban biang ïa ka jingbym ailad, u SP u la kyntu, “Nga kyntu ïa baroh ki nongñiah trok ba kim dei ban siew pisa ha kino-kino ki pulit kiba don ha surok hapoh ka East Khasi Hills, na ka bynta kino-kino ki kam ruh”.
Ki nongñiah trok kiba mad ïa ka jingshah dawa pisa ha ki pulit ne kino-kino ki kynhun ki lah ban phone sha ka police control room, phone ha u emergency number 112 lane ai jingujor da ka jingthoh sha ka ophis u SP, u la ong.
