Kohima, Risaw 01
Ha ka jingkylla jong ka saiñ hima sima ha Nagaland, haduh san ngut ki MLA jong ka National People’s Party (NPP) ki la kynthih bad kyntiap seng noh sha ka Naga People’s Front (NPF) kaba lamkhmat ïa ka Sorkar ha Nagaland.
Ki san ngut ki MLA ka NPP ki long u A. Nyamnyei Konyak (48 Moka AC), Nuklutoshi (22 Arkakong AC), C. Kipili Sangtam (59 Seyochung-Sitimi AC), Dr. Tseilhoutuo Rhutso (9 Kohima Town AC) bad Benei M. Lamthiu (57 Thonoknyu AC).
Kane ka jingpynïasoh seng thymmai jong ki 5 ngut ki MLA ka NPP ka la long ha ka sngi Palei ha Dimapur ha ka jingïadon lang jong u Myntri Rangbah ka Nagaland bad President ka NPF u Dr. Neiphiu Rio, u Adviser & Secretary General NPF u Achumbemo Kikon lem bad kiwei ki nongïalam ka party.
Hadien ba la pynïasoh sha ka NPF, ki san ngut ki MLA ki la leit mih pat hakhmat u Lamphang ka ïingdorbar bad ha kaba la aiti ïa baroh ki kot ki sla kiba ïadei bad ka jingpynïasoh ka jong ki.
Katkum ka jingpynpaw na ka NPF, la ong ba ki san ngut ki MLA ki la pynïasoh sha ka NPF da ka mon sngewbha ka jong ki bad ban pynpaw ka jingshaniah ka jong ki, ha ka jingïalam jong u President ka NPF bad Myntri Rangbah Neiphiu Rio da kaba kdew ruh ïa ka nongrim bad ki polisi jong ka party.
Na ka liang u Rio u la kdew ba ka rai jong ki, ka dei kaba biang bad ka lynti kaba dei bad ong ba ka NPF ka mihkhmat ban pynneh ïa ka tynrai bad ka jingangnud jong ki Naga.
