Shillong, Risaw 01
U Superintendent of Police (SP) ka East Khasi Hills Bah Vivek Syiem ha ka sngi Palei u la kynthoh jur ïa ka jingshna video AI ba pynthohbria ïa u lem bad ïa u Symbud Myntri Rangbah Bah Prestone Tynsong, kaba la saphriang paidbah hadien ka jingkyndang ka KSU ban sei pyrthei ïa ka jingkynnoh khrong pisa beaiñ ki pulit ha Mawkhanu bad Thangshalai.
“Ha ka juk AI, shibun ki memes la shna. Ngin sa peit ïa kaei kaba ngi lah ban leh,” ong u SP.
U la ong ba ka tnad Pulit kam shym la shah ne pynshlur ïa kum kine ki kam beaiñ.
“Peit, ha ka juk AI shibun ki video la ïa shna. Kam dei ka jingshisha ba ngi la ailad ne pynshlur ïa ki pulit jong ngi ba kin leh ïa kum kitei ki kam. Ka dei ka kam kaba khia bha. Ha ka jingshisha, ki briew kila dei ban wan ai jingujor, ejahar pyrshah ïa ki briew kiba lum pisa beaiñ ha ka jaka ban ïashna memes,” ong u SP.
Haba ïada ïa ka tnad, u la ong, “Tang ka East Khasi Hills marwei ka don haduh 2500 ngut ki briew. Ym baroh ki long kumta. Ngi lah ban don u soh apple ba pyut hynrei kam mut pat ba baroh kawei ka tnad ka long kumta”.
