Shillong, Risaw 01
U MLA ka Nongstoiñ, u Bah Gabriel Wahlang ha ka sngi Palei jong ka taïew, u la leit ban ujor da ka FIR ha Police Station Nongstoiñ, pyrshah ïa u samla thepkam uba kynnoh ïa u, ba u donkti ban dawa pisa ban pynrung kam ha MCH Nongstoiñ, kumba T.4 lak.
Haba kren sha ki lad pathai khubor, u Bah Gabriel u la ong ba ha kaba nyngkong u la kwah ban shu sngap, hynrei hadien u ïohi ba kane ka kam ka la kylla politik patde.
“Ngam banse ban ujor da ka FIR, khnang ban lap ïa ka jingshisha baroh, la kino kita kiba donkti ban leh ha kane ka kam, bad balei ki pynmih ïa ka kyrteng jong nga,” u la ong.
“Nga kwah ban tip, la ka don ne-em kaba kum kata ban dawa pisa ban pynrung kam ha Nongstoiñ,” u la bynrap.
Halor ka jingleit pynsangeh u MDC ïa ka interview Staff Nurse, u Bah Gabriel u la ong ba ka jingleh jong u ka long kumba u leit pynwit, pyntieng ïa ki samla kiba dang pynkhreh ban leh ïa ka interview.
U la ïaroh ruh ïa baroh ki ophisar, da kaba pynthikna ba kane ka exam ka long khuid long suba, bad kam shym la don kano-kano ka bynta ban leh ïa ki kam ban shu dawa pisa tang ban pynrung kam.
