Mumbai, Risaw:
Hapdeng kane ka jingkyrduh um kaba dang ïaid shakhmat, u Myntri ka tnat Revenue jong ka Maharashtra, u Chandrashekhar Bawankule, u la bthah ïa ki bank ba kin kiar na kaba leit jngoh ïa ki ïing ki sem jong ki nongrep ban ïoh biang ïa ki ram ba dang sahteng. U la bthah ruh ïa ki heh sorkar ban bishar bniah ïa ka jinglah ban kyrpad ïa ka Reserve Bank of India (RBI) ban pynmih ïa ki kyndon kiba buh ïa kum kine ki kam ban pynïoh biang ïa ka pisa ha ka jingpynsangeh.
Ha ka jingïalang jong ka cabinet sub-committee jong ka jingïarap ïa ka jingkyrduh um kaba la pynïaid da u Bawankule ha ka sngi Ba-ar, la bthah ïa ki bor pynïaid ban pynjari da ka jingpynduna um kaba 10 percent ha kylleng ki jaka sor. Ka panel ka la bthah ruh ïa ki heh sorkar ban pynneh pynsah ïa ka um ba la pynim kum ka jaka buh kyrpang ban pynbiang ïa ki jingdonkam haduh u bnai Jylliew jong u snem ban wan, ong ka kyrwoh khubor.
Ka kyrwoh na ka tnad sorkar ka la ong ba mynta ki dang don haduh 560 tylli ki tanker ban pynpoi um ha kylleng ka Maharashtra. Ki dkhot jong ka panel ki la ban jur ruh ïa ka jingdonkam ban thmu lypa ban pynthikna ba ka um dih kaba biang kan don na ka bynta ki 10 bnai ban wan, haduh ban da wan ka bnai slap kaba bud.
Ka sorkar jylla, ka la kheiñ ïa ki 265 tylli na ki 358 tylli ki Talukas jong ka Maharashtra, kiba don haduh 74 percent jong ka Jylla, kum ki jaka ba shah ktah ha ka jingkhriat, hadien ka jingduna slap. Ka la pynbna ruh ïa ki lad jingïarap kiba bun jait, kynthup ïa ka jingpynbeit thymmai ïa ki ram mar rep, ka jingpyllait ne jingailad ïa ka khajna jaka, bad ka jingai jingïarap ïa ka bai bording.
Ka la pyntreikam ïa ka ‘Trigger-1’ hapoh ka jinghikai jong ka na ka bynta ka jingpynïaid ïa ka jingkyrduh 2016 (ba la pynthymmai ha u snem 2020) bad ka Drought Management Code ban pynbna ïa ki jinglong jingman jong ka jingkyrduh bad ban sdang ïa ka jingïarap.
Ka Trigger-1 ka dei ka kyrdan ba nyngkong ha ka rukom treikam jong ka jingkyrduh jong ka jylla, kaba la pyntreikam da ka jingduna slap kaba palat 25 percent ryngkat bad ka jingkhriat kaba slem haduh 21 sngi.
Katkum ka jingong jong ka Principal Secretary Vinita Ved Singhal, la ïathuh ba ki don ki jingduna ha ki 265 tylli ki taluka jong ka jylla katkum ka jingtip ba la ïoh na ki Divisional Commissioner.
Ki jinglong jingman jong ka jingkhriat ki la paw shai hapoh ka kyndon ‘Trigger-1’, katba 43 tylli ki Taluka ki la biang hapoh ka ‘Trigger-2’.
Dei ban pynmih ïa ka Government Resolution (GR) kaba donkam khlem da ap ïa ka jingpynslem ha ka rukom treikam na ka bynta ki 43 tylli ki thaiñ bad kiwei kiwei ki jaka ba shah ktah, ka la ban jur.
Ka Trigger-2 ka dei ka bynta ba ar jong ka jingpeit bniah kaba bishar bniah ïa ka jingjur bad jingktah ba shisha jong ka jingkyrduh da kaba pyndonkam ïa ki dak ba skhem ha ka met bad ka rep ka riang.
Ki dak ba kongsan ki kynthup ïa ka jingheh jong ka jaka ba la bet ïa ki jingthung bad ka jinglong/jingpynjot jong ki jingthung baroh kawei, ka jinglong jong ka um hapoh khyndew bad ka jaka buh um ba kongsan ne ka jaka buh um ha sla khyndew.
U Bawankule u la bthah ïa ki heh sorkar ban pynthikna ba ki nongrep kin ym shah pyndik na ka bynta ban ïoh biang ïa ki ram rep ha ka por ba don ka jingeh.
U la kylli ruh na u Chief Secretary u Rajesh Aggarwal ban pynthikna la ka Reserve Bank of India (RBI) ka lah ne em ban pynmih ïa ka Circular ha kaba ïadei bad ka jingpynsangeh ban siew ïa ka ram.
Dei ban bthah ïa ki nonglum distrik bad ki heh pulit ban pynthikna ba ki bank bad ki Credit Society kim dei ban leit sha ki nongrep ban ïoh biang ïa ki ram mar rep, la ong u Myntri.
Ki kynhun treikam sorkar baroh kawei, khamtam ki talathi, ki gram sevak bad ki ophisar ka rep ka riang, ki dei ban sah ha la ki jong ki jaka bad ban buddien bha ïa ka jinglong jingman, u la bynrap.
U Singhal u la ong ba watla la dep ban bet ha 96 percent ka jaka, hynrei ka jinglong jingman ba shisha jong ki jingthung ha madan ka long kaba sngewkhia.
Dei ban pynlong ïa ka jingwad bniah kaba shisha bad ban ai ïa ka kaiphod kaba khatduh haduh ka 25 tarik u Risaw, ka la ong.
U Bawankule u la bthah ïa ki heh sorkar ban pynthikna ïa ki jingïarap baroh kiba lah ban ai sha ki nongrep bad u la ong ba la ïoh ïa ki jingsoi jong ki nongrep ha ki kaiphod bishar bniah ïa ki jingjulor jong ki jingthung.
U la ong ba donkam ïa ki lad ki lynti ban pynïaid ïa ka jingduna jingbam bad um bad ban pynbeit ïa ka jingpyndonkam ïa ki stok ha ki dam bad ki pung.
Lah ruh ban hap ban buh kyndon ha ki projek shna ïing kiba heh, katba ki kam kum ki surok dewbilat bad kiba ïadei bad ka jingpynlut kai ïa ka um dei ban kiar, u la ong.
Ki nonglum khajna jong ki distrik ki dei ban pyndonkam hok ïa ka pisa jong ka CSR na ka bynta ban ïarap ïa ka jingkyrduh um, la ai jingmut u Bawankule.
Yn buh hakhmat eh ïa ka um dih bad ka jingbam na ka bynta ki jingri. Ki pung shnong bad ki Percolation Tank yn buh kyrpang na ka bynta ka um dih.
Ka jingbuh hakhmat eh na ka bynta ban mang ka dei ban long ka um dih, ki mar rep bad ki mar rabi kum u kew bad u pai, la ong ka jingpynlait khubor.
Ka myntri ka tnad mariang ka Pankaja Munde ka la ai jingmut ban pynsangeh noh shipor ïa ki jingbit ban shna ïa ki ïing sah bad ki jaka khaïi ha ki jaka ba ïakynduh ïa ka jingkyrduh um bam um dih.
