Shillong, Risaw 01
Ka Khasi Students’ Union (KSU) ka la dawa da ka jingtohkit kaba laitluid bad kaba khuid halor ka jingkynnoh khrong pisa beaiñ da ki pulit ha ki sem ba pynïeng ha Mawkhanu bad Thangshalai, bad ong ban ujor ïa ka ejahar (FIR) sha ki pulit ka la dei lypa ka bym don jingmut.
U General Secretary ka KSU samla Reuben Najiar ha ka sngi Palei u la ong, ki dkhot jong ka seng ha ka sngi Balang ki la lap ïa ki pulit kiba dang khrong pisa beaiñ na ki trok ha ka por mynsngi mynshai.
“Mynnin, ki dkhot jong ka KSU ki la hiar sha Mawkhanu bad Thangshalai bad ki la lap ba ki sem ba la pynïeng da ki pulit ki khrong pisa beaiñ, kata ruh ha ka por mynsngi mynshai, ha kaba da ki phew tylli ki trok ki wan bad siew pisa,” la ong u samla Najiar.
U la kynnoh ba ka jingkhrong pisa beaiñ ka dei kaba la jia ha ka jingbthah jong ki bor ba halor.
“Ki pulit ki ïoh ïa ka tulop bad balei ki hap ban leh ïa kum kine ki kam? Ngim kren ïa kiba rit ha ka kyrdan namar ba ki ïoh ïa ka hukum bad ki hap ban pyndep ïa ki, hynrei ki don kito kiba shong ha Secretariat bad ophis SP kiba ai hukum ban leh ïa kane,” u la ong.
Haba dawa ban shim ki lad pynshitom, u samla Najiar u la ong, “Mynta ka seng ka dawa ba dei ban weng noh mardor ïa u DC bad SP bad ba dei ruh ban don ka Departmental Proceedings pyrshah ïa kitei ki briew bad lada lap ba ki donkti dei ban kem mardor ïa ki.”
Halor ka jingujor ejahar (FIR), u samla Najiar u la ong, “Ujor FIR ban peit mano, ki pulit kin ong ba kin sa peit bniah bad shimkhia ïa ka, kaei ka ban myntoi? Ngi kwah ïa ka jingtohkit kaba khuid, ka kynhun kaba khuid ka ban tohkit ïa kine, namar kumno u nongtuh un bishar ïa u nongtuh, kata kam lah ban jia, hynrei kum ka jingdonkam ngi hap ban pyndep ïa kata.”
