New Delhi, Nailur:
Ka ïingbishar ba hakhliehduh ha ka sngi Ba-ar, ka la pynpaw biang ïa ka jingsngewsih kaba jur halor ka jingsiew kaba heh bha kaba la shim da ki hospital bad ka khañi pateng jong ki dawai na ka bynta ki jingpang ba shyrkhei kum ka jingpang bampong (Cancer), hadien ba ka la kdew ba “kane ka dei ka jingpynïap briew, ka bym don dak ei ei bad kaba suk.”
Ka kashari ka la ong ba haba u dawai bampong u don ha u nongdie mar tang 2,700 tyngka, hynrei ka dor (Maximum Retail Price) jong u ka long kaba la buh ha ka dor 27,000 tyngka, ka buh ïa ka jingkit kaba khia ïa u nongpang ba kyrduh bad ïa ki nongsiew khajna.
“Kane ka dei ka jingpynïap briew. Ka bym don dak bad kaba suk. Ïa u dawai Cancer la buh dor ha ka MRP kaba T.27,000 watla la pynbiang sha ki nongdie mar ha ka dor kaba T.2,700. Ki hospital jong ki kompeni kim ju pyllait ïano ïano ruh. Kim shah wat ïa ka met ïap ban sei shabar. Ki jaka ai dawai kim ju pyrwa ei ei,” la ong ka kynhun ki nongbishar ba la ïathuh da u Solicitor General u Tushar Mehta kumba la pynpaw na ka bynta ka Centre.
Ka ïingbishar bahakhliehduh ka la pynpaw ïa kine ki jingkynthoh kiba shyrkhei hadien ba ka la sngap ïa ki jingujor kiba ïadei bad ka jingpynbeit ïa ka dor jong ki dawai, ki jingthoh dawai ba la shna kyrpang bad ki jingpynïaid ïa ki mar hapoh ka Drugs (Prices Control) Order (DPCO), 2013.
Ka ïingbishar ka la kyrpad ïa ka sorkar pdeng ban pyrkhat ïa ka lad ban pynbeit ïa ka dor kaba ïaryngkat kaba 16 percent ha baroh ki dawai. Ka kynhun nongbishar jong u Justice Vikram Nath bad u Justice Sandeep Mehta ki la ïohi ha ka jingbishar ba ki jingujor halor ki Corporate Hospitals kiba pynbor ïa ki nongpang ban thied dawai na la ka jong ka Chemist lane na kawei ka Pharmacy ruh ki long kiba khia bha.
Ka kashari ka la kylli ïa u Mehta balei ba dei ban don ka jingïapher ha ka Margin hapdeng ki dawai kiba donkam bad ki bym donkam. U la ong ba lah ban pyrkhat ïa ka jingpynkylla kaba 16 percent ha ka MRP na ka bynta uwei pa uwei u dawai. U Mehta u la jubab shuh shuh ba lada u nongpang u shah sumar katkum ka skhim sorkar, ka jingkit jong ka dor jong u dawai ha kaba kut ka hap ha u nongsiew khajna.
