Bengaluru, Risaw:
U Myntri ka sorkar pdeng u HD Kumaraswamy u la kynnoh ba ka projek shna surok Bengaluru sha Mysuru Infrastructure Corridor (BMIC) kaba la pynlong da ka Nandi Infrastructure Corridor Enterprises (NICE) ka dei ka kam thok kaba la kamai palat 3 lak klur tyngka, kaba heh tam ha ka ri. Ka kham heh ban ïa ki kam thok 2G bad dewïong, u la ong bad dawa na u Myntri Rangbah ka jylla u D.K. Shivakumar ba un leh ei ei pyrshah ïa ka Managing Director Ashok Kheny ne ban iehnohkam.
U Kumaraswamy u la kynnoh ba la pynkylla ïa ka rukom treikam tynrai jong ka projek ban pynïar ïa ka jingdonkam jaka na ka bynta ka surok bad ban pynsuk ïa ki jingmyntoi jong ki riew shimet. U la ong ba ki dang pyrkhat ban ïaleh pyrshah da ka aiñ bad ban wanrah ïa ka jingpynsngewthuh sha ki nongrep.
Haba ai ïa ki kot ki sla ha ka jingïalang bad ki nongthoh khubor ha Bengaluru, u Kumaraswamy u la ong ba ïa kane ka projek la thmu nyngkong eh kum ka surok Bengaluru-Mysuru Infrastructure Corridor bad ïa ka MoU kaba nyngkong la ïasoi ha u snem 1995 ha ka por ba u Deve Gowda u long kum u Myntri Rangbah. U la ban jur ba ka jingpynbeit tynrai kam dei bad ka NICE hynrei bad kiwei pat ki tnad.
Ka sorkar ka la mynjur nyngkong ïa ka rukom treikam ha kaba u nongpynroi shimet u dei ban kit ïa ka jinglut jingsep ha kaba shna bad shim jaka, bad ban ïoh biang ïa ka jingbei tyngka lyngba ka jinglum khajna bad pynroi ïa ki shnong ki thaw. Ha u snem 1996, ha ka por ba u J. H. Patel u dang long Myntri Rangbah, ka kynhun Myntri ka la mynjur ban shna ïa ka surok ba siew bai lutksan da kaba shim ïa ka jaka kaba heh 6,999 akar, bad 13,194 akar na ka bynta kawei ka shnong, bad la soi ïa ka Framework Agreement. Ka NICE kam shym la don bynta.
U Kumaraswamy u la kynnoh ba ha u snem 2004, u Myntri pynroi sor ha katei ka por u DK Shivakumar u la pynkylla ïa ka BMICP Alignment khlem ka jingmynjur jong ka kynhun Myntri. U la kynnoh ba la buh kyrpang 9,468 akar na ka bynta ka surok siew bai lutksan bad 10,724 akar na ka bynta ban pynroi ïa ki sor, kaba la pher na ka jingthmu tynrai na ka bynta san tylli ki jaka sor. U la ong ba ka NICE hadien ka la rung sha kane ka projek lyngba ka jingïateh bad ka KIADB. “Ha ka por jong u Deve Gowda, ka NICE kam shym la donkti lang,” u la ong.
U Kumaraswamy u la kynnoh ba ïa ka Framework Agreement ba tynrai ba la mynjur da ka kynhun myntri la pynkylla dur ha ka Outline Development Plan ba la pynthymmai hapoh u Shivakumar, uba long u khlieh jong ka BMICPA ha katei ka por. Ka jingpynbeit ryntih ba la pynkylla ka kynthup ïa 12 tylli ki pung, ki temple bad ki jaka tep, bad ïa kane ka projek la pyndonkam ban pynsuk ïa ka jingdie, jingaiwai bad jingpynroi ïa ki jaka ba la ïoh tynrai ne ba la pynbna na ka bynta ka lynti ïaid lynti jong ki jingtei, u la kynnoh.
“Ha ka por ba nga dang long Myntri Rangbah ha u snem 2007, ka kynhun myntri ka la shim ïa ka rai ba u nongpynroi um dei ban don hok ban die ne pynkylla ïa ka jaka kaba long shi bynta jong ka surok bad ki bynta ba ïakynduh jong ka BMICP,” u la ong. Hynrei, katto katne ki jaka hadien la die ne pynroi lyngba ki kompeni shimet bad u la ïatreilang.
Haba pynkynmaw biang ïa ka jingïateh lailiang jong u snem 2002 kaba don bynta bad ka NICE, ka NHAI bad ka sorkar Karnataka, u la kynnoh ba la pynrung lyngba jong ka ïa ki kyndon kiba ïadei bad ka jingdie ne jingpynkylla ïa ka jaka projek. U Kumaraswamy u la batai ïa katei ka jingïateh kum ka jingkylla kaba khraw ha katei ka projek kaba la thmu ban shna khnang ban thaw ïa ki lad ki lynti na ka bynta ka jingmyntoi pisa jong ki riew shimet, bad u la khot ia ka kum ka “jingleh thok kaba la thmu”. U la pynïadei bunsien ïa u Shivakumar bad u nongpynmih ïa ka NICE, u Ashok Kheny.
U Kumaraswamy u la kynnoh ba ïa ki jaka ba la pynbna na ka bynta ka BMICP hadien la thied, pynkylla bad pynroi, kynthup ïa ki jaka ba ïadei bad u hynmen jong u DK Shivakumar bad u MP barim u DK Suresh. Haba pynmih ïa ki kot ki sla jong ka jaka, u la kam ba kumba 10 akar eiei ba la ïoh ha ki kyrteng kiba ïadei bad ka longïing jong u Shivakumar ki dei ki jaka sorkar ha ka por ba thied. U la kynnoh ba la leh bakla ïa ki kot ki sla jong ki jaka bad ka jingwan rung tuh ha ka jaka Gomala, bad u la pan ïa ka jingjurip da ki drone ban pynthikna ïa ka jingheh jong ki jaka.
U la buh jingkylli ruh ia ka jingdonkam ban pynïar shuh shuh ïa katei ka projek haba ka surok bah jong ka ri hapdeng ka Bengaluru bad ka Mysuru ka la dep treikam. “Lada phi (Shivakumar) phim don bor ban pynbeit ïa kaei kaba la jia, iehnohkam bad hiar shuki noh”, u la dawa. U la maham ruh ba un sa pynpaw pyrthei shuh shuh ïa kum kine ki kam thok bad u la tuklar ïa u Shivakumar ban ïatai nia paidbah halor ki sienjam halor ka Vidhana Soudha.
U Kumaraswamy u la kynnoh ba ka spah jong u Shivakumar ka la kiew na ka T.4 klur ha u snem 2004 sha ka T.1,413 klur ha u snem 2023. “Kumno ka la kiew haduh katne ha ki 20 snem? Namar ka projek BMIC” u la kynnoh shuh shuh.
U Kumaraswamy, u la pyllait paidbah ïa ka audio clip, ha kaba u Ashok Kheny, u kren shaphang ki skhim ai jingkular jong ka jylla bad ba ka sorkar, ha kaba kut, ka lah ban shah pynbor, ba kan ïakhlad bad ki jingdon jingem, kum ka Vidhana Soudha lane ka Vikasa Soudha.
