Bhubaneswar, Risaw:
Ka INDIA bloc ha ka sngi Ba-ar ka la khot ban pynlong ïa ka pakhang shnong ha Odisha ha ka 8 tarik u Risaw ban dawa weng noh mardor ïa ka MMDR Amendment Act, 2026, ka jingiehnoh kam jong u Myntri ka School and Mass Education u Nityananda Gond halor ka jingbakla ha ki kot pule skul, bad ka jingiehnoh kam bad kem ïa u Chief Election Commissioner u Gyanesh Kumar halor ka jingkynnoh ba u la trei bymhok ha kaba ïadei bad ka jingpyntreikam ïa ka Special Intensive Revision (SIR) exercise.
Haba ai jingkren ha ka jingïakhih hajan ka ïing sah jong u Myntri Rangbah ka jylla, u Mohan Charan Majhi hangne, u President ka Odisha Pradesh Congress Committee (OPCC) u Bhakta Charan Das u la ong ba ka Congress bad ki paralok jong ka INDIA bloc kin pynthikna ba ïa ka jingkhang khyrdep yn bud ryntih da ka jingsuk ha baroh kawei ka jylla.
Ka kynhun synrop ka la thmu nyngkong eh ban pynlong jingïakhih ha ïingdorbar ha ka sngi Ba-ar. Hynrei la pynkylla hadien ba la pynsangeh noh ïa ka dorbar Lyiur ha ka lah sngi U Blei. Da ki spah ngut ki nongïalam bad ki nongtrei jong ki paralok ba ïatreilang, kiba kynthup ïa ka seng CPI (M), CPI, CPI (ML) Liberation, Forward Bloc, Nationalist Congress Party, Samajwadi Party bad Rashtriya Janata Dal, ki la ïasnohkti lang ha katei ka jingïakhih.
Ka jingïakhih ka la jur bha namar ki nongïakhih ki la ïakynad bad ki bor pahara hadien ba ki pulit ki la khanglad ïa ki ban ïaid sha ka ïing sah jong u Myntri Rangbah ka jylla.
Da kaba thmu ïa ka sorkar jylla kaba la pynsangeh noh ïa ka ïingdorbar khlem da jubab ïa ki jingkylli halor ka MMDR Amendment Act bad ki jingkynnoh ba don ki jingbym ïahap ha ka jingpyntreikam ïa ka SIR, u Das u la ong ba ka sorkar kam lah ban iehnoh ïa ki mat ba la pynpaw da ki paidbah.
“Ka INDIA bloc kan pynlong ruh ïa ka jingïakhih ha ka district Keonjhar kaba riewspah ha ki marpoh khyndew ha ka 7 tarik u Risaw ban pyrshah ïa ka aiñ thymmai ban tih marpoh khyndew, la pynbna u Das.
U la kynnoh ba ka Odisha kan duhnong kumba T.1 lak klur bad T.12,000 klur man u snem hadien ba la pyntreikam ïa ka aiñ MMDR ba la pynkylla. “Yn pynlong ïa ki jingïalang bad ki jingkhang ïa ka ïoh ka kot ha kylleng ki jaka tih marpoh khyndew ba kongsan ha ka 8 tarik u Risaw ban pynsangeh ïa ka jingtih bad jingshalan ïa ki marpoh khyndew,” u la ong.
U State Secretary ka CPI (M) u Suresh Chandra Panigrahy u la ong ba ka MMDR Amendment Act, 2026, kan ktah ïa ka hok bad ka ïoh ka kot jong ki jylla kiba riewspah ha ki marpoh khyndew kum ka Odisha.
“Ki jingdawa ba kongsan jong ka jingïakhih ki long ban pynduh noh ïa ka aiñ pynkylla MMDR, 2026, ban ïada ïa ka hok marpoh khyndew jong ka Odisha bad ka jingsynshar hi ha ka liang ka pisa tyngka, bad ban ïada ïa ki marpoh khyndew jong ka jylla na ka jingshah lute jong ki kompeni,” u la ong.
