Kolkata, Risaw:
U Myntri Rangbah ka West Bengal, u Suvendu Adhikari, u la pynbna ban ai bicycle khlem jingsiew na ka bynta ki 12.59 lak ngut ki khynnah kiba shong klass VIII naduh u snem pule-puthi ban wan.
Ka sorkar Trinamool Congress (TMC) kaba la ïalam da ka Mamata Banerjee, ka la sdang ïa kane ka skhim sam bicycle kum ka ‘Sabuj Sathi’ ha u snem 2015 na ka bynta ki khynnah skul jong ki skul ba ai jingïarap na ka sorkar. Ka sorkar BJP ka la pynkylla kyrteng noh ïa ka da ka ‘Sarathi’.
Haba pynbna ïa kane ka projek hapoh ka skhim ‘Sarathi’ ha kawei ka prokram ha Howrah, u Adhikari u la ong ba ïa ki Industrial Unit lane ki nongshna bicycle kiba don bynta ha kane ka skhim yn ai jaka ha kane ka jylla khlem jingsiew eiei.
U Adhikari, u la sam ia ki bicycle sha ki khynnah skul ha kawei ka skul ha Howrah bad u la kynnoh ba ka sorkar barim, ka la thied ïa ki bicycle “ki bym biang dor” hapoh ka skhim ‘Sabuj Sathi’.
“Mynshwa ïa ki bynta jong ki bicycle la wanrah na Jalandhar ha Punjab, ka sorkar barim ka ju ai kontrak sha kawei kaba ha ïing ha sem jong ka Myntri Rangbah barim bad katto katne kiba ithuh ïa ka ban shna ïa ki bicycle da kine ki bynta, ngi la pynsangeh noh ïa kane ka rukom treikam”, u la ong.
“Ngin ai jaka ban buh ïa ka jaka ka ban shna ïa ki bicycle kiba bha ha Howrah, haduh 12.59 lak ngut ki samla pule kin ïoh ïa ki bicycle mynta u snem pule lyngba ka skhim Sarathi”, la ong u Adhikari.
U Myntri Rangbah ka jylla u la ong ba la mang 300 klur tyngka kum ka Composite Grant na ka bynta ki skul hapoh kane ka skhim.
U la kynnoh ruh ïa ka sorkar barim ba ka la ai jingïarap ïa ki samla pule sha kawei ka jaitbynriew kum shi bynta jong ka “politik pynsngewbha” jong ka. U la ong ba yn pynbeit ïa ka rukom treikam bad ki samla pule na baroh ki jaitbynriew kin ïoh ïa ka Scholarship.
U Adhikari u la ai jingmut ïa ki khynnah skul ba ki dei ban pyndonkam duna katba lah ïa ki mobile phone tad haduh Class XII.
U la ong ruh ba ka sorkar jong u, kan ym ai T.10,000 sha ki samla pule Higher Secondary na ka bynta ki Smartphone bad ki mobile tablet, kumba la leh da ka sorkar barim. Ha ka jaka kata, u la ong, yn ai pisa kaba kham heh ban thied ïa ki tiar pule.
Haba kynnoh ba ka sorkar jong ka kynhun Left bad ka sorkar TMC ba ïalam da ka CPI(M) ka la khang ïa ki prokram NCC ha ki skul, u Adhikari u la ong ba u la ïakren bad u Myntri ka tnat ïada ri u Rajnath Singh halor kane ka kam.
U la ong ba yn pynim biang ïa ki NCC unit ha ki jaka pule ha kylleng ka jylla ban pynbha ïa ka jingkoit jingkhiah ha ka met jong ki samla pule bad ban kyntiew ïa ka jingshngaiñ jong ka ri.
“Ngi dei ban shah beh kam da ka jingïeid jaitbynriew bad ban ïoh mynsiem na ki jingmut jingpyrkhat jong u Syama Prasad Mookerjee, uba la don bynta ha kaba ker kut ia ka West Bengal kaba mynta. Mynta ki samla ki dei ban kynmaw ïa ka jingnoh synñiang bad ka jingaiti jong u ha kaba pynim ïa ka ri jong ki Sanatani Hindu”, la ong u Adhikari.
