Shillong, Risaw 01
U MLA ka Bharatiya Janata Party na Pynthorumkhrah u Bah A.L Hek, haba kyntait ïa ka jingkynnoh u President ka Meghalaya Pradesh Congress Committee (MPCC), u Bah Vincent H. Pala, u la ong ba ka jingthmu ba hakhmat eh jong ka Party ka long ban shakri ïa ki paidbah bad ka Party ka pdiang sngewbha ïa baroh.
U Bah Pala u la kynnoh ba ka BJP kam dei ka paralok kaba lah ban shaniah, hadien ba 8 ngut ki MLA ka UDP ki la rung sha ka BJP.
Haba jubab ïa kane ka jingkynnoh, u MLA ka Pynthorumkhrah u la ong, “Ka mat jong nga ka long kaba shai bha. Ngi khlem pyrshah ïa kano-kano ka sengsaiñ pyrthei. Kiwei ki sengsaiñ pyrthei ki don la ka jong ka jingmut halor kiwei pat ki sengsaiñ pyrthei. Hynrei ka mat jong nga ka long ba haba 8 ngut ki MLA ka UDP ki la rung sha ka BJP, ngi la kiew ka jingdon ki nongmihkhmat sha ki ‘double digit’ namar mynta ngi don 10 ngut ki MLA hapoh ka ïingdorbar thawaiñ.”
U Bah Hek ula ong ba ka BJP ka pynleit jingmut bha ha ki paidbah ka Jylla, “Ka kamram jong ngi ka long ban ïada bad pynneh ïa ki hok jong ki paidbah ka Meghalaya. Kane ka dei ka jingkitkhlieh kaba kongsan tam jong ngi. Hooid, ngi dei ki dkhot ka BJP kaba synshar ïa ka Ri baroh kawei, hynrei ka kamram jong ngi ka long ban peit ïa ka bha ka miat bad ïa ki jingeh ba ki paidbah ki mad” la ong u Bah Hek.
U la bynrap, “Ngim don hangne ban ïaleh pyrshah ïa kano-kano ka jingngeit ne ka niam. Ka BJP kam wan ban ïaleh pyrshah ïa kano-kano ka jaidbynriew. Ngi don hangne ban trei, ban ïaleh pyrshah ïa ki jingeh kiba ktah ïa ka jingngeit jong baroh, ïa ka kynhun jong ngi ne ïano-ïano. Ngi don hangne ban shakri ïa ki paidbah. Ym don ka niam kaba kham halor ban ïa ki paidbah. Nga ngeit ba ka jinglong briew ka long kaba kongsan tam. Watla ki dei na kano-kano ka jingngeit ne ki ngeit ïa kano-kano ka niam, kane ka wan hadien, hynrei ki paidbah longbriew manbriew ka dei ka jingpynleit jingmut kaba kongsan tam bad kata ka long ban shakri ïa ki paidbah.”
Haba la kylli la yn dang don kiwei pat ki nongïalam ki ban leit rung sha BJP, u Bah Hek u la ong, “Nga la ong ïa kane mynshuwa bad mynta ruh nga dang ong ba ki jingkhang jong ka BJP ki long kiba plie ïa baroh. Uno-uno uba don ka mon, ki nongïalam, ki MLA barim, ki MDC barim, ki MLA, MDC kiba dang don ha ka shuki lada ki kwah ban rung sha BJP, ki jingkhang jong ngi ki long kiba plie bad ngi pdiang sngewbha ïa ki.”
Haba ïadei ka jingdawa ban ïoh kham bun ki shuki Myntri, u la ong, “Ka dei pura ka bor jong u Myntri Rangbah ba un shim ïa kata ka rai. Ngam don eiei ban ong halor ka jingbynta shuki Myntri.”
Haba kylli la yn rah ïa kane ka mat sha u Union Home Minister, Amit Shah, ha ka jingwan jong u ha nongbah Shillong ha ka 4 bad 5 tarik Risaw, u Bah Hek u la ong, “Ngi don bun ki mat ban ïakren. Ngi kyrmen ba haba u Union Home Minister un wan sha Shillong, lada ngi ïoh lad ban ïakynduh ïa u, ngin sa rah ruh ïa kane ka mat. Katba ka rai bad ka jingai jingmut yn sa shim da ki nongïalam ba na Delhi.”
“Lada ngi ïoh ïa ka lad ban ïakynduh, ngin sa pynpaw ha u ïa baroh ki jingeh kiba ka Party ka ïakynduh hapoh ka Jylla Meghalaya, ngin rah ïa kine ki mat sha u” u la bynrap.
