Shillong, Risaw 01
U Amit Shah uba dei u Myntri ka Sorkar Pdeng ba dei peit ïa ka tnad kam pohïing uba la pynkhreh ban wan sha Shillong ha ka 4 tarik bad ka 5 tarik mynta u bnai Risaw bad ka lah ban don ka jingïapynbeit ban bate Myntri thymmai ha ka Sorkar MDA-2.
Katkum ki khubor ba la ïoh lum la ïathuh ba u Amit Shah haba un wan sha Shillong ha kine ki ar sngi u lah ban don ka jingïalang kaba kyrpang bad u Conrad K Sangma uba dei u Myntri Rangbah ka Jylla, ki 8 ngut ki MLA ka UDP kiba dang shu rung sha ka BJP ban ïa pynbeit haba pynrung Myntri thymmai ha ka Sorkar MDA-2.
Ki khubor ki ïathuh ba kine ki 8 ngut ki MLA ka UDP kiba dang shu rung sha ka BJP ki la buh ka jingdawa ban pynrung Myntri sa ar ngut bad uwei u Symbud Myntri Rangbah hynrei kane ka jingdawa ka dang sahkut namar kim pat ïoh ïa ka jubab na ki nongïalam ka BJP na Delhi.
Shuh shuh ki khubor ki ïathuh ba na kine ki phra ngut ka la mih ka kyrteng u Bah Kyrmen Shylla u MLA na Khliehriat bad u Bah Mayralborn Syiem na Nongpoh ban pynrung Myntri ha kane ka Sorkar MDA-2 kaba la ïalam da ka NPP, katba ka kyrteng u Bah Lahkmen Rymbui uba dei lypa u Myntri ha ka Sorkar MDA-2 na ka bhah ka UDP ki kwah ban pynkiew kyrdan noh kum u Symbud Myntri Rangbah ka Jylla. Ki khubor ki ïathuh ba ka jingwan u Amit Shah sha Shillong ka lah ban dei ka jingïapynbeit khatduh ban bujli Myntri thymmai.
Shuh shuh ki khubor ki ïathuh biang ba lada kane ka jingdawa ban bujli Myntri ïa kine ki MLA thymmai ka BJP kan urlong, la sngewthuh ban shah weng Myntri kan dei uwei na ka UDP bad uwei na ka HSPDP.
Lada kine ki ar ngut ki MLA ka BJP kin ïoh Myntri thymmai kaba mut ba ka BJP kaba don 10 ngut ki MLA kan ïoh bhah haduh saw ngut ki Myntri ha ka Sorkar MDA-2, namar ar ngut ki la ïoh lypa kata u Bah Sanbor Shullai bad Bah Lahkmen Rymbui.
Kumban shu pynkynmaw kine ki phra ngut ki MLA ka UDP ki la leit ïakynduh ïa u Amit Shah ha Delhi ha kine ki bnai ba la dep halor ki mat jong ka jaidbynriew ban dawa pynrung ïa ka ktien khasi ha ka khyrnit kaba phra, ban pyllait ïa u dewiong, ban pyntreikam ïa ka MRSSA, ban weng noh ïa ki briew kiba sah ha Them Metor.
Kine ki phra ngut ki MLA UDP kiba la rung sha ka BJP ha ka 23 tarik Nailur 2026 ha nongbah Delhi ki long u Bah Lahkmen Rymbui, Bah Kyrmen Shylla, Bah Pius Marwein, Bah Mayralborn Syiem, Bah Olan Suin, Bah Matthew Beyond Kurbah, Bah Balajied Syiem, Bah Synshar Lyngdoh Thabah.
U Amit Shah uba la pynkhreh ban wan sha Shillong ha ka 4 tarik bad 5 tarik Risaw ka long ban pynkup da ka President’s Colour ïa ki pulit ka Meghalaya ha JN Stadium, Polo, ha ka 5 tarik Risaw.
Kum ka jingpynkhreh, ka bor synshar District jong ka East Khasi Hills ka la pynbna ïa ka jaka kaba lai kilomitar sawdong jong ka JN Stadium kum ka No-Drone Zone naduh ka 2 tarik haduh ka 5 tarik u Risaw.
Ïa ka President’s Colour la ai sha ki pulit ka Meghalaya ha kaba sdang jong une u snem da ka tnad kam pohïing kum ka jingithuh ïa ka jingshakri, ka jingtrei kam bad ka jingshimkhia jong ki ban pynneh pynsah ïa ka shongsuk shongsaiñ ha ka Jylla.
Ha ka 5 tarik Risaw la khmih lynti ba yn don lang u Myntri Rangbah ka Jylla u Conrad K Sangma bad u Symbud Myntri Rangbah ka Jylla uba dei ruh u Myntri kam pohïing (Police) u Bah Prestone Tynsong.
