Shillong, Risaw 01
U General Secretary ka Khasi Students Union (KSU) u samla Reuben Najiar uba la ïoh jamin shipor na ka bynta 14 sngi, na ka daw ka jingjia ba sngewsih ha ka ïing ka sem jong u, ha ka 01 u Risaw 2026 u la leit aiti biang ïalade (Surrendered) hakhmat ka ïingbishar ha shuwa ban leit biang sha along ki pulit.
Ïa u samla Reuben Najiar la synran lang da u Samla Lambokstarwell Marngar President ba dang shu shongthait ha ka jingïadonlang ki nongïalam bad ki dkhot ka KSU na ki District bad ki unit bapher-bapher.
Haba kren sha ki nongthoh khubor u Samla Reuben u la pynpaw ba ka jingïoh ‘Interim Bail’ lane ka jinglait ba shipor jong u kaba long 14 sngi ka dei na ka daw ba don ka jingjia ba sngewsih ha ka ïing ka sem jong u bad ka ïingbishar ka la hukum ïa u ba u dei ban wan ha ïingbishar ha ka 01 Risaw bad ka jingtohkit haba ïadei ka jingjia ba la jia hadien ka jingïaid rally kan dang ïaid shakhmat.
Haba ïadei ka jingjia ba la jia ha ka 19 tarik Nailar bad ka jingshah kem ki nongïalam u Samla Najiar u la ong, na ka liang jong ka KSU ka khlem leh kano-kano kaba bakla, hynrei ki pulit ki kem ïa ki nongïalam da kaba ong ba ym tip ïa ka daw ba ki shah kem, hynrei tang ki pulit hi ki ban tip kham bha ïa ki daw.
“Ha kaba ïadei ka jingjia mynha ka 19 tarik ngim shym la leh ïa ka kam kaba bakla, ki pulit ki kem ïa ngi halor ki daw ba tang ki hi kiba tip, ngi kum ki nongïalam ngi don hakhmat ngim shym la kawang maw, ngim shym la shoh ïano-ïano, hynrei to haba ki kem ïa ngi, ngi pdiang ïa kata” u la ong.
Haba ïadei ka jingkren u Superintendent of Police (SP) ka East Khasi Hills u Bah Vivek Syiem, IPS kaba u ong ba ka jingai jingbit ïa ka KSU ka dei halor ka nongrim ba shaniah ïa ka KSU bad ka jingbym don ki bor pulit ban pahara ha ka por ba ïaid ka jingïaid rally ka KSU. “Nga shu kwah ban ong hangne ba ka dei ka jingshaniah ne ka dei ka jingriam, ngi ruh ngi tip hi ba ka dei ka jingriam ban pynngat ïa ki nongïalam ka KSU, namar ba ki mat ba ngi ïakhun ngim ju pyndem” la ong u Samla Reuben.
U samla Reuben u la kynnoh ba ka jingpynngat ka Sorkar ïa ki nongïalam ka KSU ka dei namar ba ka Sorkar kam lah ban ïa kot bor bad lehse dei na kata ka daw ba ka sa phah ïa kita ki ‘mafia’ tang ban ïoh pynmih jingkulmar bad ban pynsniewdur ïa ka jingïaid rally ka KSU.
Ban shu pynkynmaw u Samla Reuben ha ryngkat u President ka KSU u Samla Raymond Kharjana kumjuh u Vice-President u Samla Pynkmen Sanmit ki la shah kem ha ki pulit ha ka 19 tarik u Nailar 2026 hadien ba ka la mih ki huri hura na ka jingïaid rally ba la pynlong ha nongbah Shillong.
