Shillong, Risaw 01
U MLA ka UDP na West Shillong Constituency Bah Paul Lyngdoh u la ong ba un hap ban bishar ïa ka saiñpyrthei hapoh ka Jylla hadien ka ilekshon MP Lok Sabha shiteng samoi bad ka ilekshon MDC ha GHADC.
U la ong ba ka sienjam ba bud jong u ha ka saiñpyrthei ka long ban sngap ïa ka jingai jingmut jong ki nongtrei bad ki nongkyrshan kiba dei kiba rai ïa u ha ka por thep vote.
Haba kylli la u dang neh ha ka UDP ne un mih noh hadien ba ki phra ngut ki la dep mih, u Bah Paul u la ong ban shim rai kam dei tang ma u marwei hynrei hap ban sngap ïa ki nongkyrshan haba ki ai jingmut.
Shuh shuh u la pynpaw ba ka jingiaidon jong u ha ka UDP ka dei namar u la hap ban bishar ïa ka jingkynrum kynram ha ka Election Commission ka ri India kaba ïadei bad ka Special Intensive Revision.
U Bah Paul u la ong ba ha ka saiñpyrthei ym don paralok ne ym don nongshun namar ha ka ilekshon ki lah ban ïakhun pyrshah hynrei hadien ka ilekshon ki lah ban ïatreilang.
U la pynpaw ka jingsngewkhia halor ka jingnang hiar arsut ka UDP namar na ka 12 ngut la sah satang saw ngut bad kine ki saw ngut ruh yn sa sah tang marwei.
Ha kine ki sngi ka kyrteng u Bah Paul Lyngdoh ka la don lang ha ka thup jong ki khyndai ngut hynrei haba la dei ban leit rung pura sha ka BJP ha Delhi la ïohi tang ki phra ngut ki MLA ka UDP, hynrei ka kyrteng bad ka dur jong u Bah Paul Lyngdoh ym shym la ïohi ban rung lang sha ka BJP ha Delhi.
