Jowai, Risaw 02
Ka Jowai Municipal Board (JMB), ha ka 2 tarik Risaw ka la pynlong ïa ka jingpynkhuid shnong ha kylleng ki ïew jong ka sor Jowai, kynthup ïa ka Iawmusiang, CNI bad ïew Seinraij, kum shibynta jong ka Swacchata Hi Seva halor ka phang, “Swachhata Mein Sahbhag, Swachh Bharat, Viksit Bharat.
Haba ai jingkren sha ki paidbah ha ka prokram lyngkot ka Kong D.V Lyngdoh, Additional Deputy Commissioner bad ka CEO jong ka Jowai Municipal Board, ka la pynpaw ïa ki nongrim ba kongsan jong ka Swachhata Hi Seva bad ka jingdonkam ban ïashim bynta lang ha kaba pynneh pynsah ïa ki jaka paidbah kiba khuid ba suba.
Ka la pyntip ba ïa kane ka Campaign la rakhe naduh ka 17 tarik u Nailur haduh ka 17 tarik Risaw 2026, ka phaikhmat sha ki jaka ïew, ki jaka jngohkai pyrthei, bad kiwei-kiwei ki jaka paidbah.
Ka la kren ruh halor ka jingdonkam ban pynïakhlad bha ïa ki jaboh naduh na ïing bad ban bret ïa ki jait jaboh bapher-bapher ha ki jaka bret jaboh ba la buh kyrpang.
Ka la pyntip ba ka Jowai Municipal Board ka la ithuh ïa ki jaka bapher-bapher ban pynkhuid kum shi bynta jong ka jingïalap bad ka dang shim ruh ïa ki kam ban kyntiew ïa ka jingpyndonkam ïa ki jaboh da ka jingkitkhlieh.
La pynlong bad yn dang pynlong ïa ki prokram bapher-bapher hapoh kane ka Campaign ban pynsngewthuh shaphang ka jingpynïakhlad ïa ki jaboh ha ka rukom kaba dei, ka jingpynïaid ïa ki jaboh da ka jingkitkhlieh bad ka jingpynneh ïa ka jingkhuid jingsuba.
Ki dorbar shnong, kiba kynthup ïa ka Tympang Iawmusiang bad kiwei-kiwei ki dong ki shnong jong ka Sor Jowai, ha ryngkat ki riew paidbah, ki Scout bad Guides, ki nongdie madan bad ki nongshong dukan ha Iawmusiang, CNI bad iew Seiñraij ki la ïashim bynta ha kane ka jingpynkhuid shnong.
Baroh ki dong jong ka Jowai Town ruh ki la ïashim bynta lang ha kane ka jingpynkhuid shnong, da kaba pynlong ïa ki kam pynkhuid ha la ki jong ki jong ki jaka.
