Nongstoiñ, Risaw 02
Uwei u briew u la shah rai pynrem ban shah set phatok shirta jingim khlem ka jingpyllait namar ka jingdonkti ka jong u ha ka kam pynïap ïa ar ngut ki briew kaba la jia ha u snem 2021.
U Superintendent of Police ka West Khasi Hills District ha ka kyrwoh khubor bala phah u la pyntip ba ha ka 24.08.2021, ka la don ka jingujor FIR na u nongmudui ba ha ka por kumba 10:20 mynstep, u nongmudui u la shem ba ka ïing ka kmie jong u ha shnong Nongstoiñ, West Khasi Hills ka la khang khyrdep na shabar.
Shuh shuh la ong ba hadien ba u nongmudui u la pynpait ïa ka tala bad leit hapoh ïing, u la lap ïa ka metïap jong ka kmie jong u (79 snem) kaba thiah hapoh ka kamra sait pliang.
La ong ruh haba u la leit khmih ha kiwei pat ki kamra, u la lap sa ïa ka metïap jong ka shakri ïing, 25 snem hapoh ka kamra thiah jong ka.
Ka khubor na u SP ka ong ruh ba halor kane, la register ïa ka mukotduma ha Nongstoiñ P.S. Case No. 54(08)2021 hapoh ki kyndon (Sections) 302/34 IPC, bad la aiti ïa kane ka jingtohkit (investigation) ha ka WPSI D.P. Nongbri, bad ha ka jingïaid jong ka jingtohkit la kem noh ïa uwei u briew ïa uba la tip kyrteng u Banphrangkupar Nongbri hadien ba la suba ba u la donkti ha katei ka kam.
La ong ruh ba hadien ba la pyndep ïa ka jingtohkit bad pynïasoh ïa baroh ki sakhi, la aiti ïa ka charge-sheet pyrshah ïa u nongshah kynnoh hapoh ka kyndon 302 jong ka Indian Penal Code.
Kumta, hadien kata, ha ka 30.09.2026, ka ïingbishar jong ka District and Session Judge, West Khasi Hills District, Nongstoiñ, hadien ba la bishar bniah ïa ki sakhi baroh la rai pynrem ïa u Banphrangkupar Nongbri, da kaba hukum set phatok kaba tyngeh (rigorous imprisonment) na ka bynta baroh ka jingim ba dang sah khlem ka jingshah pyllait, namar ka long ka kam pynïap briew kaba runar ïa ki arngut ki briew, bad ryngkat ka kuna kaba shi lak tyngka na ka bynta kawei pa kawei kaba la khlad, kum ka jingpynshitom hapoh ka kyndon U/S 302 IPC namar ka kam runar ka jong u.
