Jowai, Risaw 02
Kumba long ha kylleng ki jaka bad ki shnong, ka Loomkyrwiang Dorbar shnong ruh ha ka 2 tarik Risaw kala kynmaw burom ïa ka Gandhi Jayanti Day ne ka sngikha jong u Mahatma Gandhi da kaba pynlong ïaka Awareness Cum Cleaning Drive Programme.
Haka jingïalang lyngkot, u Ma Lammat-O Laloo, Waheh shnong kum u shongknor ula ai ki kyntien lamkhmat da kaba pynkynmaw ïa ki kam ba khraw jong u Mahatma Gandhi kum u nongïaleh laitluid ka Ri India uba ïeng ha ka nongrim jong ka jinglong kawei bad burom mar kylliang.
Ïa ka jingbatai bniah shaphang u Mahatma Gandhi bad ka thong jong ka Swachh Bharat Mission la pynsngew da u Ma S.D. Laloo, General Secretary uba ïathuh ba u Mahatma Gandhi udei u briew ba la kheiñ kor kheiñ burom ym tang ka Ri India, wat kiwei ki Ri ka pyrthei ruh ki sngewnguh sngew burom ïa ki kam bakhraw jong u bad lyngba ka United Nation General Assembly kaba la long ha u snem 2007 la pynbna paidbah ba ïa ka sngi kha u Mahatma Gandhi yn tip noh kum ka International Day of Non-Violence.
Haba bteng shaphang ka Swachh Bharat Mission u Ma S.D. Laloo, ula ïathuh ba ka Sorkar India da ka jingsngewkhia ïa ka jingthrang jingangnud jong u Mahatma Gandhi ha ka 2 tarik Risaw 2014 kala pynmih ïa kane ka skhim da kaba pynïoh paiñkhana sha ki longïing ha kylleng ki shnong ki thaw ka Ri India.
Haduh kine ki snem ka Sorkar India ha ka thong jong ka Swachh Bharat Mission kala shimkhia ban leh ïaki kam bapher-bapher kiba ïadei bad ka thong jong ka jingkhuid jingsuba, ka koit ka khiah bad kiwei ki bynta kiba ïadei bad ka bha ka miat ka imlang sahlang jong ki nongshong shnong ka Ri India.
Hadien ka jingïalang ki nongshong shnong kila shim bynta ban pule ïaka Swachh Bharat Pledge bud da ka jingpynkhuid shnong.
