Shillong, Risaw 02
U Secretary ka Shnong Thangshalai Bah Youstar Kharumnuid u la ïathuh ba ka shnong Thangsha-lai ka khlem ai jingbit ban buh ïa ka khyrdop talasi.
U la ïathuh ba ki la don ki briew ba la phah da ki pulit ban wan pan jingbit No Objection Certificate (NOC) ba kin buh ïa ka khyrdop talasi tangba ka shnong ka khlem ai hynrei ki la pynïeng hi harud surok.
U la ïathuh ba ka jingdon katei ka khyrdop lum pisa jong ki pulit ki ju ïohi tangba ka shnong kam kwah ban tuklar than namar ka dei ka kam jong ki.
“Ha jingshisha lada ki wan pan NOC na ka bynta kaba bha, ngi ai beit hynrei haba kam ïaid da ka lynti ka bym dei ngi khlem ai,” u la ong.
Haba kylli mano ba wan pan NOC, u Bah Youstar u la ïathuh ba ki don ki briew kiba la phah da ki pulit tangba haba ki khlem ai kim shym la wan mih shuh.
U la ïathuh ba ka shnong Thangshalai ka hap ha ka jingpeit jong ka thanad Mawryngkneng.
Kumban shu pynkynmaw kane ka kam lum pisa beaiñ ki pulit ka la paw pyrthei da ka jingleit khynra ki dkhot ka Khasi Students’ Union mynha ka 30 tarik Nailur 2026 ha kaba ki nongñiah trok ki hap siew sha ki pulit ha kawei ka sem ba la shna kyrpang ha Thangshalai kumba arspah tyngka kawei ka trok.
Na ka liang u Bah Vivek Syiem uba dei u Superintendent of Police ka East Khasi Hills u la bthah ïa u Bah Dangsan Khyriem uba dei u SP City ba un pynlong ïa ka jingtohkit.
