Shillong, Risaw 02
Kum shi bynta jong ka Swachhata Hi Seva (SHS) 2026 campaign, ka Sorkar Jylla lyngba ka Directorate of Urban Affairs ka la pynlong ïa ka Swachh Bharat Mission (Urban) lane ka jingpynkhuid ïa ki lynti ki syngkien ba la sdang naduh na Nongpoh ter-ter haduh Sohra kaba jrong kumba 100 kilometre.
Ïa kane ka prokram la pynlong halor ka phang pdeng “Ek Din, Ek Saath, Ek Ghanta” ha kaba la sakhi ïa ka jingshim bynta ki khynnah skul, ki kolej, ki dorbar shnong, ki seng treimon sngewbha, ki tnad treikam Sorkar bad kiwei pat.
Haba kren ha kane ka sngi u Symbud Myntri Rangbah ka Jylla u Bah Sniawbhalang Dhar u la ong ba kane ka long ka jingthmu ban wanrah ka jingkylla ha ka liang ka khuid ka suba bad ka jingpynsngewthuh ïa ki paidbah ban sumar ïa ka Mariang lyngba ka jingshim bynta lang jong ki da ka jingkitkhlieh lang ïa ka Mariang.
U la ong ba ka ‘Swachh Bharat Mission’ kam dei tang ka prokram ban pynkhuid ïa ki shnong ki thaw hynrei ka dei ban wanrah ka jingpynsngewthuh ha ki paidbah kumno ban shim ka jingkitkhlieh haba ïadei ka khuid ka suba.
Ka Sorkar Jylla ka kwah ban wanrah ka jingïatreilang hapdeng ki paidbah ha sor bad nongkyndong, la ka long ki samla, ki longkmie, longkpa, ki skul bad kiwei-kiwei ki bynta jong ka imlang sahlang ban pynkhlaiñ ïa ki jingpyrshang ban pynkhuid ha kylleng ka Jylla, khamtam ha ka nongbah Shillong.
Ha kane ka sngi u Bah Sniawbha u la pyllait ruh ïa 24 tylli ki kali jong ka Shillong Municipal Board ba kynthup 18 tylli ki kali rit bad 6 tylli ki trok ki ban kit ïa ki ñiut na ki shnong bad ki khap sor, ha kajuh ka por u la ban jur ïa ki paidbah ban pynmlien ïalade bad ha ki shnong ki thaw ban leh khuid khnang ban lah ban wanrah ïa ka jingkhuid jingsuba, u la kdew ruh ba ka Jylla ka la ïoh ïa ka jingïaroh haba ïadei ka jingkhuid na ki nong jngohkai pyrthei kiba wan hapoh ka Jylla.
Ha kane ka prokram la shim bynta lang ruh u Secretary sha ka Sorkar Jylla u S.C. Sadhu, IAS, u CEO ka Shillong Municipal Board, u P.K. Boro, ki ophisar ba rangbah, u BDO ka Mawlai C&RD Block, ki nongtrei ka CRP, ki khynnah skul, ki nongshong shnong ka Mawlai-Mawïong bad kiwei pat.
