Shillong, Risaw 04
Haba la kut noh ka jingaipor ba 15 sngi ban sangeh ïa ka jingpyntrei ïa ka 4-Star Luxury Hotel ha Umkhoi, ka Hynniewtrep National Youth Movement (HNYM) Raid Rngi Circle ha ka 03 tarik Risaw ka la leit jurip bad ban pynsngeh ïa ka ïa ka jingtei ïa katei ka Hotel.
Kum ban shu kdew hangne ka HNYM Seng Kmie mynha ka 15 tarik u Nailur 2026 ka la ïakynduh ïa u Myntri ka tnad Tourism u Timothy D. Shira ban ïakren bad ban dawa ba ka Sorkar ba ka dei ban pynsngeh ïa ka projek ba la pyntrei ïa ka 4-Star Hotel hapoh u pud u sam ka Raid Rngi da kaba kdew ba kam shym la don ka jingpynngewthuh paidbah (Public Hearing) shuwa ban sdang ïa ka jingtei ïa ka projek.
Ha katei ka sngi haba ki nongïalam bad ki dkhot ka HNYM Raid Rngi Circle ki poi ha katei ka jaka la lap ba ka jingpyntrei ïa katei ka projek ka dang ïai bteng bad don ruh bun ki nongtrei bar Jylla ba la pynlong ïa ka seng ban phah sangeh bad ïoh ban ïakren ïa u Manager ba pyntrei ïa ka projek bad dawa ban pynsangeh mardor.
Katba ki dkhot ka HNYM ki dang don ha katei ka jaka, la wan mih ki katto katne ngut ki longkmie na ka shnong Umkhoi kiba la hylla ïa ki dkhot ka Movement kiba la kynnoh ba kiba nabar kim dei ban mushlia ïa kane ka kam kaba la pynlong ïa ki dkhot ban kylli la ki dei na ka Raid aiu.
Kine ki longkmie kim lah ban ai ka jubab kaba shai ha kaba shiphang ki ong ba ka dei na Raid Mawshai shiphang pat ki ong na Raid Umkhoi. Shuh-shuh hadien kane, ki dkhot ka Movement ki la kiar noh na kaba ïa nia bad kitei ki longkmie.
Na ka liang u President ka HNYM Raid Rngi Circle u Bah Teibok Pyngrope u la pynshai ba ka jingwan ki dkhot ban pynsangeh ïa katei ka jingtrei ka long halor ka nongrim ba u Myntri ba dei khmieh ba ki la ïakynduh ha ka 15 tarik u Nailur u khlem leh eiei, wah hadien ba ka Movement ka la buh hapoh 15 sngi ba ka Sorkar ka dei ban pynsangeh ïa ka jingpyntrei ïa katei ka projek kaba la tei khlem da bud ïa ki kyndon treikam ba la pynkupbor da ka Hima Khyriem ïa ka Raid Rngi katkum ka jongpynbna (Notification) 1950.
Shuh-shuh u la ïathuh ba ha ka jingïakren bad u Manager ba pyntrei ïa katei ka projek u la kubur ban pynsangeh noh ïa ka jingtrei ïa katei ka 4-Star Luxury Hotel ha kaba u la pynpaw ba na ka liang ka Movement kan dang bteng ban peitngor ïa ka jingïaid shakhmat jong katei ka projek.
Ka Movement ka pynpaw ka jingsngewkhia halor ka jingbym sngap ka Sorkar Jylla ïa ka jingdawa wat haba la don ka jingïakren ïa u Myntri ka tnat ba dei khmieh kumjuh u MLA ka Mawkynrew Constituency u Bah Banteidor Lyngdoh.
