Shillong, Risaw 04
U Symbud Myntri Rangbah ka Jylla Bah Sniawbhalang Dhar ha ka sngi Saitjaiñ u la ong ba ka jingpynheh ïa ka liengsuiñ Shillong Airport ka la ïaid shakhmat bad ki liengsuiñ kiba heh kin sa lah ban wan hiar ha Shillong Airport hapoh ki ar snem ban wan.
U Bah Sniawbha u la ïathuh ba ka jingtrei ban pynheh ïa ka Shillong Airport kala ïaid shaid shaid mynta bad kane ka jinglah wan hiar ki liengsuiñ kiba heh kan long ka lad ban wanrah shibun ki jingkylla ïa ka Meghalaya.
Haba kren ha Nongrah Umroi, u Bah Sniawbhalang u la ong ba ka Sorkar kala don ïa ka plan kaba bun snem (blueprint) ban kyntiew ïa ka Kad sha ka lad ban pynïasoh ïa ki liengsuiñ bad kiwei ki ri ka pyrthei.
“Kane ka kad liengsuiñ kumba ka long mynta, ki kam kila ïaid shaid shaid, ngi la pynjrong ïa ka runway. Sa tang kumba hapoh kine ki 2 snem eiei, ki liengsuiñ kiba heh kin sa lah ban wan hiar hangne. Hadien kane phin sa ïohi ïa ki jingkylla ki ban sa wan ha Meghalaya, ha kaba baroh kin sa ithuh ym tang ha ka kam jngohkai hynrei ha ki kam ïalehkai bad kiwei kiwei ki bynta ruh,” u la ong.
Haba pynpaw ïa ka jingthmu kaba kham heh, u Bah Sniawbhalang u la ong, “Ngi thmu ha kum kane ka rukom lyngba ka ‘blueprint’ ba balei ngi shim ïa ka surok bah hakhmat kane ka shnong. Ngi kwah ba ha kawei ka sngi ïa kine ki jaka baroh ka Sorkar kan ïoh pura ban pynlong ïa ka kum ka ‘International Airport’, ym tang kum ka National Airport.”
U la ong ba ka surok Four-Lane corridor kan sa nang lah ban kyntiew shuh shuh ïa ka jingpynïasoh sha ka kad liengsuiñ.
